La Universidá d'Uviéu publica'l primer llibru de testu pa la enseñanza universitaria del asturianu
CON C DE CIENCIA Y CULTURA
El Serviciu de Publicaciones de la Universidá d'Uviéu, na so colección Textos Universitarios, acaba de publicar el llibru de testu Averamientu a la llingua asturiana-Nivel universitariu, obra del profesor Ramón d'Andrés. Esti llibru ta inspiráu nes enseñances impartíes na asignatura 'Llingua asturiana 1: normativa, competencia y usu (I)', del Mínor d'Asturianu de la Facultá de Filosofía y Lletres, anque pue ser útil pa toa mena de persones interesaes nel estudiu del asturianu.
El cuerpu principal de la obra ye un averamientu o introducción a la gramática del asturianu nos sos niveles fonolóxicu, gramatical y léxicu. Tamién ofrez una parte dedicada al bon usu del asturianu escritu y faláu, con observaciones y recomendaciones; y otra parte dedicada a les fontes bibliográfiques y ferramientes dixitales que l'estudiante d'asturianu pue manexar pal estudiu sistemáticu de la llingua.
Ramón d'Andrés (Madrid, 1959) ye un veteranu profesor y investigador en filoloxía asturiana na Universidá d'Uviéu, pioneru na enseñanza del asturianu nesta universidá dende'l cursu 1984-1985, na antigua Escuela Univeristaria de Maxisteriu y na Facultá de Filosofía y Lletres.
La so trayectoria investigadora vincúlase a variaes temátiques rellacionaes col asturianu. Foi corredactor de les Normes Ortográfiques y del Diccionariu de la Llingua Asturiana, y ponente de la Gramática de la Llingua Asturiana, obres de l'Academia de la Llingua Asturiana. Miembru de númberu de la mesma y correspondiente del Real Institutu d'Estudios Asturianos, coordina'l grupu d'investigación Seminariu de Filoloxía Asturiana, de la Universidá d'Uviéu.