Andrés Menéndez Blanco recibió la calificación máxima col trabayu «Estudios diacrónicos del paisaxe y el poblamientu nel noroeste ibéricu: el territoriu d'Ayande (sieglos I-XIII)»
24 oct 2019 . Actualizado a las 09:38 h.L’arqueólogo ayandés Andrés Menéndez Blanco defendió ayeri na Facultá d’Historia de la Universidá d’Uvieo la tesis doctoral Estudios diacrónicos del paisaxe y el poblamientu nel noroeste ibéricu: el territoriu d’Ayande (sieglos I-XIII) centrada na evolución histórica d’Ayande, dirixida polos profesores Margarita Fernández Mier y Francisco Javier Fernández Conde. El tribunal, formáu polos profesores Juan Antonio Quirós (Universidad del País Vasco), Jordi Bolós (Universitat de Lleida), Alejando García-Álvarez (Universidá d’Uvieo), Rebeca Blanco (Universidade de Santiago de Compostela) y Xulio Viejo (Universidá d’Uvieo), otorgó la calificación máxima al final del actu. L’estudio recibió la calificación máxima y ye la primera tesis doctoral presentada na Facultá d’Historia que ta escrita íntegramente n’asturiano.
La tesis estudia la evolución del poblamientu n’Ayande y los territorios inmediatos a partir de múltiples fontes y técniques d’investigación. Nella axúntase información proveniente de prospecciones y escavaciones arqueolóxiques, documentación escrita, toponimia o tradición oral, sobre la que s’apliquen les últimes técniques pal so análisis. Partiendo d’estos datos faise una revisión de toles evidencies de los sitios fortificaos, el poblamientu históricu o menciones na documentación pa desenvolver una lectura de les tresformaciones del territoriu a lo llargo de más d’un mileniu: l’abandonu de los poblaos castreños, l’aparición del poblamientu abierto o la formación de los distintos territorios alministrativos hasta la fundación de la villa de La Puela y la creación del conceyu que llegó hasta los nuestros díes.
Esta tesis ye tamién pionera nel uso de la llingua asturiana na Facultá d’Historia. Lo mesmo la redacción del texto que la so defensa oral realizáronse íntegramente nesta llingua. Quíxose con ello dar un pasu hacia la normalidá del uso del asturiano nel ámbito académicu.
Los resultaos obteníos ayuden a dar lluz sobre dalgunos de los interrogantes actuales de la investigación histórica. El trabayu fechu va permitir por ello introducir Ayande como un exemplo d’estudio nos intensos debates académicos que tán desenvolviéndose agora n’Europa alredor d’estes cuestiones. Per otru llau, l’autor formula la necesidá de continuar coles investigaciones nesti conceyu pol gran interés de dalgunos de los sitios arqueolóxicos que guarda y pol so potencial como recursos pal desenvolvimientu local.