El festival acuta un güecu en distintos espacios pa promocionar la industria audiovisual del Principáu
07 nov 2019 . Actualizado a las 11:46 h.El Festival Internacional de Cine de Xixón quier convertise nun escaparate pa los trabayos audiovisuales asturianos. Per segundu añu consecutivu, la sección oficial inclúi una película asturiana El trabajo, o a quién le pertenece el mundo, de la directora llavianesa Elisa Cepedal. Trátase d'una semeya vanguardista, en formatu fotoquímicu, del procesu de desindustrialización de la cuenca del Nalón y de los efectos de la mesma sobro los sos paisaxes y la so xente. Nun ye la primer vegada que Cepedal participa nel FICX. Yá lo fixo na edición de 2017.
Amás de Cepedal, el cineasta uvieín Tito Montero completa la nómina de la presencia asturiana nel principal espaciu competitivu del FICX. Nel so casu, na sección oficial de Curtiumetraxes, con Un fantasma recorre […], trabaja en el que nel que, a partir de la confrontación de dos semeyes de Goya, convoca al espíritu escaecíu del xeneral Rafael del Riego, l'héroe lliberal de la Revolución de 1820 en Tinéu.
Los pases especiales de la 57 edición (57FICX) van ser otru momentu nel que los espectadores van poder tomar el pulsu al cine de cuñu asturianu. Va poder asistir al estrenu mundial d'Hotel Asturies, la nueva pieza de Ramón Lluís Bande, na que nueve cineastes de la rexón, usando un cuartu del emblemáticu hotel xixonés, cavilguen sobro'l séptimu arte nel Principáu. Tamién va poder esfrutar Carne de gallina, 18 años dempués del so estrenu. El pase va cuntar cola presencia del so director, Javier Maqua y el so coguionista ya intérprete, Maxi Rodríguez.
Tamién la competición internacional Rellumes va incluyir l'estrenu mundial d'una producción con autoría asturiana. Trátase de Desaparecer, un curtiumetraxe, robláu por Diego Llorente, que cunta'l final de la rellación ente un mozu y una moza cuando'l primeru tien de movese, por motivos llaborales, de Xixón a Madrid.
N'Esbilla, l'espaciu que'l FICX dedica a recoyer lo meyor de los festivales europeos y mundiales, según otros estrenos de calter especial, la industria audiovisual del Principáu va tener otru güecu con Obertura de un milagro (Juan Luis Ruiz Fernández, 2019), Pacífico Sur (Inés Paz & Marta González, 2019), Cuca, retrato de una mujer (Carlos Navarro, 2019), Memorias culturales de un pasado industrial (Rubén Vega & Irene Díaz, 2019), SWAB 2000: Steve Wynn & Australian Blonde, live at Moby Dick Club (Aure Raspies, 2019) y S.A.D. Las hadas existen (Palmira Escobar Martos, 2019)