«Ye una pena que nun pueda tenese la mesma reconocencia n'asturianu qu'en castellán»

Xaime Martínez, galardonau col Premiu Nacional de Poesía Moza por «Cuerpos perdidos en las morgues»

Xaime Martínez
Xaime Martínez

Xaime Martínez foi galardonáu esti xueves col Premiu Nacional de Poesía Moza «Miguel Hernández 2019», una «sorpresa absoluta» pal «llibru más ventureru» del autor, según señaló en conociendo la noticia.

L'autor llamentó en declaraciones a Europa Press que nun llograría esti galardón si'l llibru pol que foi premiáu, «Cuerpos perdidos en las morgues», tuviera escritu n'asturianu. «Ye una pena que nun pueda tenese la mesma reconocencia n'asturianu qu'en castellán».

«Esti premiu d'esta manera confirma que ye posible escribir una poesía venturera formalmente y llegar a dalguna xente», dixo'l escritor, quien hasta agora, diz que solo tuvo «idees absurdes» sobro lo que faer cola dotación del premiu --20.000 euros--, como «montar una ganadería de lleche».

Martínez dixo qu'agora escribe tou n'asturianu y que nun tien «intención» de volver escribir en castellán. «Siéntome más cómodu porque ye la llingua d'Asturies», esplicó l'autor, de la qu'apunta que ta «minorizada» y «por una anomalía inesplicable nun tien reconocencia oficial nel Estáu».

Anque escribir n'asturianu, que al so xuiciu yera «la llingua de la xente probe», tien una «carga política y emocional bien interesante», Martínez dixo que'l conflictu pola cooficialidá «nun esiste na sociedá». «Más de la metá de la población ta a favor y menos del 20 per cientu en contra. Nun hai xuna discutiniu real sinón d'unes élites», atayó.

El xuráu escoyó esta obra «pola intelixencia poética manifiesta nel usu ficcional de la poesía, amás d'una fascinante capacidá pa proponer una llectura innovadora del poema». Coles mesmes, destaca la concepción del llibru como «arquitectura poética» y el so apueste pola tradición de la rotura combínase «con un humor coraxosu y sorprendente».

Xaime Martínez Menéndez (Uviéu, 1993) graduóse en Filoloxía y nestos momentos realiza estudios de doctoráu na Universidá d'Uviéu. Ye autor de los poemarios «Fuego cruzado» (2014), col que ganó'l XVII Premiu de Poesía Moza Antonio Carvajal y «Hibernia» (2017), esti últimu escritu n'asturianu.

Participó na trescripción' del llibru «Principios organizativos del patarrealismo salvaje» (2016), firmáu col heterónimu colectivu de Rinoceronte García. Amás, forma parte del grupu musical La Bande, col que publicó los discos «La llamada del hombre ciervo» (2015) y «Un cadáver exquisito» (2016). Amás, publicó anguaño'l discu «Ósculos d'agua nel imperiu asturianu».

El xuráu tuvo presidíu por Begoña Cueto Prada, subdirectora xeneral de Promoción del Llibru, la Llectura y les Lletres. Como vocales tuvieron presentes Helena González Fernández, pola Real Academia Galega; Koldobika Josu Bijuesca Basterretxea, pola Euskaltzaindia; Vicenç Llorca i Berrocal, pol Institut d'Estudis Catalans; o Nuria Barrio Fernández, pola Asociación Colexal d'Escritores (ACE).

Tamién formaron parte del xuráu María Consuelo Candel Vila, pola Asociación Española de Críticos Lliterarios; Antonio Lucas Herrero, pola Federación d'Asociaciones de Periodistes d'España (FAPE); María do Cebreiro Rábade Villar, pola Conferencia de Rectores de les Universidaes Españoles (CRUE); Rosa María Aradra Sánchez, pel Centru d'Estudios de Xéneru de la UNED; Vicente Valero Marí, designáu pol Ministru de Cultura y Deporte; y Berta García Faet, autora gallardonada nel añu 2018.

Comentarios

«Ye una pena que nun pueda tenese la mesma reconocencia n'asturianu qu'en castellán»