José Ángel Gayol lleva'l premiu d'ensayu del Gobiernu d'Asturies por «El silenciu invisible»

«El llibru xuega cola estratexa comunicativa de les elítes al traviés de la pintura», afirma'l ganador

José Ángel Gayol
José Ángel Gayol

Oviedo

L'escritor José Ángel Gayol ye'l ganador de la XXV edición del Premiu Máximo Fuertes Acevedo d'Ensayu n'asturianu, que concede la Conseyería de Cultura, Política Llingüística y Turismu, cola obra El silenciu invisible.

El xuráu encargáu de valorar les obres presentaes reunióse esti xueves baxo la presidencia del director xeneral de Política Llingüística, Antón García, y tuvo formáu pol escritor Damián Barreiro Maceiras, ganador de la edición pasada; la profesora y crítica lliteraria Marta López Fernández y la profesora de la Facultá de Filosofía y Lletres, Cristina Valdés Rodríguez

Ente les obres presentaes, el xuráu decidió por mayoría conceder el premiu a la titulada 'El silenciu invisible', que se presentó col seudónimu Albert Camus, al reconocer nella «la so fondura intelectual, la capacidá d'análisis de la realidá a partir de les obres pictóriques y l'habilidá pa texer idees y afirmaciones de calter políticu, filosóficu o social, dando voz a lo que nun s'oi y lluz a lo que nun se ve», según destaca l'acta.

A esti gallardón, dotáu con 5.000 euros, podíen presentase obres de tema, xéneru y estructura llibre que reunieren les característiques del xéneru ensayísticu entendíu na so amplitú.

José Ángel Gayol (Mieres del Camín, 1977) ye escritor y críticu lliterariu. Depués de ganar el Premiu Asturias Joven de Poesía en 2006, publicó obres en dellos xéneros -novela, poesía, teatru y ensayu- y tuvo reconocimientos importantes, ente los que s'incluyen los premios de poesía Elvira Castañón, Fernán Coronas y Xuan María Acebal, o'l mesmu Premiu d'Ensayu Máximo Fuertes Acevedo, que yá llogró nel 2015 cola obra «Vértigu».

«La estratexa comunicativa de les élites»

L'escritor José Ángel Gayol, ganador del Premiu Máximo Fuertes Acevedo d'Ensayu del Gobiernu d'Asturies con El silenciu invisible, esplicó qu'esta obra xuega cola pintura pa mostrar «la estratexa comunicativa de les élites».

En declaraciones a Europa Press, l'escritor afirmó que recibe'l gallardón «con muncha satisfacción y allegría» y como «un reconocimientu a la obra y al trabayu», porque facese con él «anímate a siguir escribiendo». El gallardón ta dotáu con 5.000 euros y ente les obres presentaes, el xuráu decidió por mayoría conceder el premiu a la titulada El silenciu invisible.

Trátase, según indicó Gayol, d'un ensayu que busca «llamar l'atención sobre la falsedá o la distorsión que tenemos sobre lo que ye la realidá sociopolítica, al nun tener un conocimientu real sobre lo qu'asocede colos asuntos públicos». Asina, l'autor destaca «los mecanismos que s'usen les élites pa distorsionar la realidá» con un «xuegu de trés pates» basáu nel conocimientu social --lo que pensamos que ye la verdá--; la ventana comunicativa --el rellatu creáu poles élites-- y la verdá esterior --lo que de verdá pasa--.

Too eso al traviés de les más conocíes obres del arte pictóricu mundial, porque «un pintor recueye lo que quier destacar pa producir un efectu nel espectador» de la mesma manera que les élites polítiques y económiques «marquen lo que pues ver y cómo pues velo, al mesmu tiempu que lu oculten». Gayol pretende que mentes el llector llee'l llibru y conoza les sos reflexones personales, pueda buscar les imáxenes de les obres, pa, al traviés de capítulos curtios, «xugar cola estratexa comunicativa de les élites».

Comentarios

José Ángel Gayol lleva'l premiu d'ensayu del Gobiernu d'Asturies por «El silenciu invisible»

Cola ayuda de