Cueva Güerta sal de la escuridá

El mundu soterrañu del cuévanu natural más grande d'Asturies tien tovía muncho por revelar

Cueva Güerta. /La Voz del Trubia
Cueva Güerta. /La Voz del Trubia

Ye una xoya natural d'Asturies y al empar una gran desconocida pa munchos asturianos. Cueva Güerta ye'l cuévanu natural más grande d'Asturies y la so esploración ye'l frutu del trabayu de delles xeneraciones d'espeleólogos. L'últimu mapa publicáu amuesa más de 23 kilómetros de galeríes, sales y pozos ya inclúi siete kilómetros de conductos desconocíos dafechu. El mundu soterrañu d'esti monumentu natural tien tovía muncho por revelar.

Cueva Güerta ta en Fresnéu, en Teberga y el trabayu d'esploración, planimetría y cartografiáu foi impulsáu pol Colectivu Asturianu d'Espeleólogos (CADE) y la Federación d’Espeleoloxía del Principáu d’Asturies. En 2012 empezó un estudiu nuevu del cuévanu col envís non solo d'afayar y esquizar nueves galeríes, sinón d'ellaborar una topografía completa de la cueva y el so modelu tridimensional, allugar la presencia de quirópteros y documentar el cuévanu y el so patrimoniu natural nel so conxuntu. En cada estudiu espeleolóxicu de la cueva, col usu de sistemes láser, fuéronse afayando nuevos pasaxes soterraños y más conductos tres una minuciosa esploración y topografía, que nun supera un erru valoráu nel 2,59%.

El desnivel alcanzáu ente los puntos más altu y más baxu de la cueva güei ye de 281 metros. Hai que recordar que la so esploración empezó nos años 50 y qu'en 1972 yá se descubrieren y cartografiaren 14 kilómetros de galeríes y pozos. La cueva tien un gran valor faunísticu, de primeres, por ser hábitat de la siempres sorprendente fauna troglobia, cavernícola estricta, ayalga de biodiversidá. Son seres morfolóxicamente bien modificaos y d'estraña apariencia, a los que puede considerase como fósiles vivientes, que los sos antepasaos desapaecieron de la superficie terrestre mientres el Terciariu. Y, de segundes, por ser refuxu de delles especies d'esperteyos, como l'esperteyu de cueva», especie protexida d'interés especial.

El Principáu reguló l'accesu al interior del cuévanu instalando una gran puerta en 1996, midida que foi reforzada darréu.

Precisamente güei a les 19.30 hores, nel llocal social del Atenéu Obreru de Xixón, Ástura entama una conferencia sol títulu Monumentu natural de Cueva Güerta, hestoria d'una esploración, al cargu d'Alberto Espina, un veteranu y amigu del monte dende la so infancia, esperimentáu espeleólogu del Grupu d'Espeleoloxía Diañu Burllón de Corvera dende l'añu 2011 y miembru del Grupu de Espeleosocorro Asturianu. Mientres esti tiempu, participó nel descubrimientu y documentación de numberoses cueves y torques kárstiques de la Sierra del Sueve y de los Picos d'Europa, lo mesmo que de Cueva Güerta. La entrada ye llibre.

Comentarios

Cueva Güerta sal de la escuridá