Xixón arrinca la colección Rene de Coupaud cola publicación y analís de tres Mises de Gaita
28 nov 2019 . Actualizado a las 05:00 h.La colección René de Coupaud arrincó cola publicación de Tres Mises de Gaita. Ente la tradición y el caltenimientu del patrimoniu asturianu. L'área de Cultura del Conceyu de Xixón rinde asina homenaxe a De Coupaud, que foi una figura esencial na vida musical d'Asturies y de Xixón. La colección va dir publicando distintos trabayos venceyaos a la investigación y a la recuperación del patrimoniu musical, de repertorios, ceadores ya intérpretes rellacionaos col ámbitu asturianu y bien especialmente con Xixón.
La Colección René de Coupaud empecipia con Tres Mises de Gaita. Ente la tradición y el caltenimientu del patrimoniu asturianu, qu'inclúi un llibru de 48 páxines robláu pol Cateralgu de Musicoloxía Ángel Medina sobro'l valor patrimonial de la misa de gaita y dos cedés de les mises grabaes pol Taller de Músicos que fueron compañeros de René.
Recueyen tres mises de gaita distintes, a cargu del Taller Lolo Cornellana, Mari Luz Cristóbal Caunedo y Pepe’l Molín, col acompañamientu a la gaita de Llorián García Flórez y Xaime Menéndez, amás de dos grabaciones históriques de la misa de gaita de Salas, una de los años 50 y otra de 1994. La dirección musical de les tres mises correspuende a Joaquín Valdeón.
La Misa de gaita, declarada Bien d'Interés Cultural en 2014, surde na so configuración actual nel sieglu XVIII. Anguaño namái pervive en determinaos conceyos asturianos, como Salas, Ayer, L.lena, Quirós o Llanes y desapareció dafechu d'otres rexones del noroeste d'España onde inda se caltenía a empiezos del sieglu XX.
«El fechu de que salgan a la lluz estes grabaciones reviste una gran importancia; principalmente por sumase a la limitadísima llista de grabaciones públiques que tenemos d'esti repertoriu y porque ye una importante contribución al caltenimientu, espardimientu y divulgación d'una de les manifestaciones más singulares del patrimoniu musical y cultural d'Asturies», afirmó Alberto Ferrao, conceyal d'Educación y Cultura.
Amás de distribuyise na rede municipal de biblioteques, va ponese a disposición de les persones interesaes, que van poder solicitalo al traviés de la web (cultura.gijon.es), na que tamién va tar disponible'l llibru en formatu pdf en castellán y asturianu.