Candás va acoyer n'ochobre'l 'Regueriada Fest', un festival dedicáu a la cultura asturiana
CON C DE CIENCIA Y CULTURA
El primer escritor n'asturianu de nome conocíu, Antón de Marirreguera, y el Barrocu van ser los temes d'ambientación
15 ene 2020 . Actualizado a las 17:56 h.La Conseyería de Cultura, Política Llingüística y Turismu y el Conceyu de Carreño van poner en marcha'l 'Regueriada Fest', un festival del llibru y de la cultura asturiana que se va celebrar en Candás del 22 al 25 d'ochobre.
El primer escritor n'asturianu de nome conocíu, Antón de Marirreguera, y el Barrocu --la época na que vivió-- van ser los temes d'ambientación, implicando nél a escritores, llibreríes, editoriales, profesoráu, alumnáu y sociedá de Carreño en xeneral.
El director xeneral de Política Llingüística, Antón García, y l'alcaldesa de Carreño, Amelia Fernández, celebraron esti miércoles una reunión de trabayu col oxetivu, per una parte, de poner en marcha nesti 2020 el Serviciu de Normalización Lligüística de la Mancomunidá del Cabu Peñes, y, per otru, avanzar xuntos na realización d'esti festival.
El certame va acoyer actividaes lúdiques como un festival cosplay, amás d'artes escéniques, música y gastronomía, ente otros. El Regueriada Fest naz cola idea de celebrase anualmente.