Estos son los discos n'asturianu más vendíos de 2019

La música n'asturianu publicó en 2019 un total de 35 producciones, onde destaquen les autoediciones

Llan de Cubel
Llan de Cubel

Oviedo

La industria de la música n'asturianu sacó a la cai a lo llargo de 2019 un total de 35 producciones, onde destaquen les autoediciones con un total de 12 discos publicaos polos propios grupos. El discu más vendíu de 2019 ye «La lluz encesa», de Llan de Cubel.

Son datos del «Anuariu de la Música Asturiana» recoyíos por Europa Press, nun añu nel que se publicó l'esperáu sestu discu del prestixosu grupu Llan de Cubel, «La lluz encesa», amás del trabayu nuevu de Rodrigo Cuevas, «Manuel de Cortejo». Otra manera, el Gobiernu autonómicu dedicó la Selmana de les Lletres a la música n'asturianu. La metá de los discos editaos n'asturianu nel 2019 englóbense dientro de la etiqueta folk, anque mecida con otres escenes como'l pop --«La cereza'l cielu», de Cerezal--, la canción d'autor --«Blinca», de Luis Núñez-- o'l jazz --«Obsolescencia programada», d'Eladio Díaz--. 

Pero sobre too, destaca les conexones ente'l folk y la electrónica, con un total de cuatro discos: «Foli», de Fruela 757; «Lug», de Bras Rodrigo; «Falando», de Músicos pola Oficialidá; y «Manual de Cortejo», de Rodrigo Cuevas. Otros xéneros que tuvieron protagonismu na música n'asturianu a lo llargo del 2019 foron, en númberu de trabayos editaos, la tonada, la canción d'autor, la electrónica, el rock y la música infantil.

Los más vendíos

Per otru llau, el discu n'asturianu más vendíu de 2019 ye 'La lluz encesa', de Llan de Cubel, siguíu del grupu L-R col so discu «Post-Folk asturianu». El rock de Dixebra col so discu en directu grabáu n'Uviéu, Caldo y Os Rabizos col so trabayu sobre la música del Navia-Eo y Eva y Les Pandereteres con «L'Entamu» completen el Top 5 del 2019.

«Carombu», de Xuacu Amieva & Dobra; «Ósculos d'Agua nel Imperiu Asturianu», de Xaime Martínez; «Miraes», de José Mnauel Tejedor; «La Cereza'l Cielu», de Cerezal'; y «Baillando con Llokes», de La Tarrancha, completen la llista de los diez discos n'asturianu más vendíos nel 2019. Son datos de musicasturiana.com recoyíos por Europa Press, nun añu onde esta plataforma vendió un total de 600 discos de música n'asturianu.

Comentarios

Estos son los discos n'asturianu más vendíos de 2019

Cola ayuda de