Les inscripciones pa les primeres pruebes oficiales d'asturianu van principiar el 6 de febreru

El Principáu convocó yá les primeres pruebes de certificación de llingua asturiana, pa los que van poder concurrir un máximu de 500 aspirantes y que se van celebrar a finales de mayu n'Uviéu. El plazu d'inscripción pa los interesaos ábrese'l 6 de xineru y acaba'l 14 de febreru. Trátase de les primeres pruebes oficiales que van establecer los niveles de competencia nel usu de la llingua asturiana, que se va convocar polo menos una vez al añu pa un mínimu d'ún de los niveles (A1, A2, B1, B2, C1). Nesta primer convocatoria'l nivel de competencia ye l'Intermediu B2.

Les persones interesaes han presentar les sos solicitúes d'almisión ente esti xueves, día 6, y el vienres 14 de febreru nos siguientes centros: IES Aramo, n'Uviéu; IES Calderón de la Barca, en Xixón; IES Carreño Miranda, n'Avilés; o IES Bernaldo de Quirós, en Mieres.

Los exercicios de les cinco partes que componen la prueba de certificación de llingua asturiana van realizase en dos bloques. Nel bloque 1, que se va realizar el vienres 29 de mayu, van ser los exercicios correspondientes a les partes de comprensión de testos escritos, de compresión de testos orales y de producción y coproducción de testos escritos. Nel bloque 2, que se va realizar en xornaes distintes a partir del xueves 21 de mayu, van facese los exercicios correspondientes a la parte de producción y coproducción de testos orales y a la parte de mediación.

Les sedes escoyíes pa la realización d'estes primeres pruebes de acreitación son la Facultá de Formación del Profesoráu y Educación, onde se va desarrollar íntegramente el bloque 1, y l'IES Aramo, onde los aspirantes van realizar les pruebes correspondientes al denomináu bloque 2, según informa Europa press.

---

---