L'aplazamientu d'eventos culturales y el pieslle de teatros y auditorios va paralizar la música n'Asturies les selmanes próximes
13 mar 2020 . Actualizado a las 19:09 h.L'aplazamientu d'eventos culturales y el pieslle de teatros y auditorios va paralizar la música n'Asturies les selmanes próximes, lo que xenera un impás nos trabayadores, que reclamen midíes a l'Alministración y responsabilidá a la población pa que cumpla los encamientos de les autoridaes y, asina, nun periodu curtiu de tiempu poder volver a la normalidá.
Asina lo esplicaron dellos músicos y trabayadores del sector n'Asturies en declaraciones a Europa Press depués de que Gobiernu asturianu y los Conceyos anunciaren l'aplazamientu y suspensión de tolos eventos programaos pa esta quincena en teatros y espacios culturales pa intentar frenar la crisis sanitaria xenerada pol coronavirus.
Nesi sentíu, el guitarrista Rubén Bada, componente de formaciones como L-R o Alce y Navaya, indicó que nestos momentos los músicos tán «a veles venir» depués de la suspensión d'eventos. «Tamos intentando recolocar feches y mirando si hai dalguna opción de mantenese a flote estes selmanes que tenemos de parón», esplicó, pa recordar que yera agora cuando principiaba la temporada de conciertos depués del parón del iviernu.
«Anicia la temporada con pérdides», indicó, pa reclamar a les alministraciones midíes más concretes de cara al recibu del IVA p'autónomos d'abril. «Lo que me prestaría ye que se creara conciencia de que la música a nivel profesional ye otra actividá empresarial que lleva muncho tiempo y necesita d'inversiones bastante altes, nun somos cuatro amigos tocando la guitarra», afirmó Bada.
«Cuanto primero pasemos esto vamos poder volver a la vida normal, si siguimos ensin cumplir los encamientos de les autoridaes esto va siguir espardiendose y allargándose nel tiempu y hai xente que si s'allarga esto va pasalo mui mal, como los autónomos, onde tamos munchos artístes», sentenció l'artista.
Per otru llau, A Mansalva ye una compañía cultural con varios departamentos --escuela de música, sellu discográficu, management y producción-- dirixida por Pablo Carrera, qu'afirmó que la situación xenerada pol coronavirus «aféctanos en cada estaya en mayor o menor midía».
La empresa peslló esti xueves les sos instalaciones, peles que pasen una media de 80 persones al día ente maestros, alumnos, padres o públicu. Carrera esplicó que'l «factor común» en tolos departamentos de la compañía ye que ta compuesta por trabayadores por cuenta propia, como maestros, músicos o técnicos que trabaya tamién pa otres entidades.
Nesi sentíu, diz que l'aplazamientu de conciertos supón na mayoría de los casos devolver el 100% del importe de les entraes y que nun van ser válides pa otra fecha. Amás, cuando la situación tea normalizada y vuelvan a poder programase eventos van coincidir munchos eventos y va ser preciso un gastu nuevu en promoción. Too eso ensin recuperar lo yá invertío, polo que Carrera reclama al Gobiernu central midíes económiques que tengan en cuenta la situación del sector cultural.
Otra manera, el músicu Rodrigo Joglar ye director de la Banda de Gaites LaKadarma y maestru na Escuela de Música y Danza Popular de Noreña, que por orde del Conceyu suspendió toles clases. Pel momentu, tán devolviendo a los alumnos la cuota correspondiente d'esti mes ensin saber que va pasar n'abril.
Joglar tamién pon clase de gaita al traviés de Skype, «anque yera pa xente que vivía fuera d'Asturies y nun tol mundu tien esti instrumentu en casa», esplicó, p'añadir que esto «pue ser una solución pa nun dexar esi vaciu». Per otru llau, comentó que la banda que dirixe, LaKadarma, paralizó tola so actividá en metá de la grabación d'un discu, lo que supón un «trestornu gordu» y «parar un ritmu de trabayu de meses».
El gaiteru recordó que nestos momentos n'Asturies hai munches persones que viven de la música, pero la crisis sanitaria ta xenerando l'anulación de toles actuciones de música en directo «y nun hai alternativa». «La xente que vive de la música tenia previsto ingresos de conciertos pa esti mes y ve que quedan aplazos», sentenció.