Destaquen el desconciertu que se ta produciendo a la d'interpretar el decretu publicáu'l 19 de xunu
13 jul 2020 . Actualizado a las 14:05 h.Los colectivos de APTAEA y EscenAsturias, col respaldu de 12 entidaes, 50 empreses y 213 profesionales del sector del espectáculu, fixeron públicu un manifiestu nel que busquen treslladar a la opinión pública y a les autoridaes competentes la esmolición pol so futuru y esixen flexibilidá na normativa qu'afecta a les actividaes rellacionaes colos espectáculos en directo, siendo los sectores de les artes escéniques y de la música los más afectaos.
Amás, destaquen el desconciertu que se ta produciendo a la d'interpretar el decretu publicáu'l 19 de xunu. Destaquen los colectivos que les normatives pa espectáculos son les más estrictes del país, porque amás d'obligar al públicu a usar mázcara, tamién obliga a caltener la distancia de 1,5 metros ensin posibilidá d'agrupamientos de convivientes nin de grupos polo xeneral, situación que nun pasa en nenguna otra comunidá autónoma pa espectáculos públicos, pero que si se permite na hostelería.
«Ye obvio qu'esta normativa yá ta afectando al sector porque nos consta que munches entidaes locales nun tán realizando programaciones por "inviabilidá" y mesmo, depués de la publicación de la normativa, cancelaciones de programaciones, como pasó a dellos asociaos d'EscenAsturias», alvierten.
Por eso, consideren que ye imprescindible que'l Gobiernu del Principáu unifique la interpretación de la norma y nel so casu realice con urxencia los cambios afayadizos p'afacer la norma a les actividaes escéniques, musicales y proyecciones de cine que se tán ufiertando al públicu con agrupaciones de siyes o butaques.