«La colomina 36» prepara una segunda edición depués d'un mes nes llibreríes
CON C DE CIENCIA Y CULTURA
La novela escóso esta selmana la so primer edición
16 jul 2020 . Actualizado a las 19:22 h.«La colomina 36», novela ucrónica de Nicolás Bardio ambientada na Asturies soviética de 1970, escóso esta selmana la so primer edición depués d'un mes nes llibreríes. Ediciones Trabe, la responsable d'esta publicación, yá ta trabayando na so segunda edición
La novela foi la ganadora del Premiu Asturies Xoven de Narrativa de 2019 y el mesmu presidente d'Asturies, Adrián Barbón, recomendó hai un par de selmanes la novela nes sos redes sociales. "Tenía munches ganes de lleer 'La colomina 36' de Nicolás Bardio. Prestóme facelo, pues t'engabita dende'l minutu ún. Cada páxina presta. Ún de los nuestros autores mozos qu'escriben en llingua asturiana. Non una promesa futura, sinón presente", publicó'l presidente.
'La colomina 36' ta ambientada nuna Asturies alternativa, onde trunfó la Revolución d'Ochobre de 1934. Asina, convirtióse na República Socialista Soviética d'Asturies (RSSA), que forma parte de la URSS. Trátase d'una novela d'espíes que ta protagonizada por Fabián, un axente que sal de l'Academia del KGB y tien que facese pasar por un vecín más nuna colomina deprimente nel Mieres soviéticu de 1970.
Nicolás Bardio (Uviéu, 1987) ye llicenciáu en Ciencies Polítiques pola Universidá Complutense de Madrid y máster n'Información y Comunicación con especialidá en Periodismu pola Universidá Llibre de Bruseles. Traductor y narrador, tien publicaes les noveles 'Sol reló' (2008), y 'Cuando ensamen les abeyes' (2011), obra ucrónica d'aventures. Nel 2019 foi a sacar el primer xuegu de rol n'asturianu, 'Depués d'Ochobre', del qu'esta novela vien a enantar el so universu, informa Europa Press.