Un equipu de la Universidá d'Uviéu quier afondar na xestión de los espacios comunales y nos raigaños medievales d'un problema del sieglu XXI
26 jul 2020 . Actualizado a las 05:00 h.La Universidá d'Uviéu, al traviés del grupu d'investigación LLABOR, realiza esti branu diverses campañes arqueolóxiques coles mires d'afondar na conocencia de la xestión de los espacios comunales de monte del Cordal Cantábricu, centrándose nel Puertu d'Andrúas, na falda del Aramu, en Quirós; la braña de los Fuexos en Balmonte; y el cordal de Cueiro en Teberga.
El trabayu, dirixíu por Margarita Fernandez Mier (Universidá d'Uviéu) y Pablo López Gómez (Universidá de Llión), forma parte del proyectu d'investigación «Espacio locales y complexidá social. Los raigaños medievales d'un problema del sieglu XXI». L'equipu d'investigación realizó na última década un proyectu qu'utilizó como llaboratoriu d'esperimentación metodolóxica Vigaña (Balmonte) y Villanueva (Santo Adriano), dos aldegues de mediu monte d'Asturies tovía habitaes anguaño. L'oxetivu ye entender l'orixe de la rede de poblamientu y los procesos de tresformamientu del territoriu.
Pa ello, plantegáronse dos intervenciones arqueolóxiques nes que s'estudiaron dende les zones d'hábitat a les zones de campera pasando peles d'usu agrícola. Al tratase d'aldegues de monte, una parte importante de la so actividá tuvo rellacionada cola actividá ganadera, dende la prehistoria hasta l'actualidá, y, axuntada a la ganadería, inxerse l'estudiu de les brañes, asentamientos d'usu estacional, dalgunos d'ellos utilizaos inda na actualidá y otros que tuvieron n'usu hasta mediaos del sieglu XX.
Estes árees caltienen unes formes colectives de xestión, bien documentadas mientres el periodu postmedieval y que podemos retrotrayer hasta l'Alta Edá Media. Estes investigaciones van amestaes al estudiu de la xestión de les zones d'usu comunal, yá que nun puede entendese'l so significáu ensin rellacionalu coles formes de propiedá, xestión y aprovechamientu de les amplies zones de campera nes que s'alcuentren.
Les distintes estratexes adoptaes pol campesináu pa caltener los sos derechos frente a monesterios, señores llaicos o l'Estáu, ayuden a entender el significáu de les brañes y les mayaes. Magar la documentación ye abondosa dende'l sieglu XIV, ye bien curtia pa periodos anteriores, d'ende la importancia de poner en marcha intervenciones arqueolóxiques que dexen afondar na hestoria del usu de les camperes de monte.
Nesti sentíu, la campaña d'esti branu empezó cola escavación d'una construcción nos puertos d'Andrúas, que pa la profesora Margarita Mier «yá dio interesantes resultaos que nos falen d'una ocupación de llarga duración que se remonta, siquier a los sieglos centrales de la Edá Media, el sieglu XIII, con nicios d'ocupación anterior que se remonta a dómina prehistórica, ensin poder determinar enagora'l calter de dicha ocupación».