Un curtiu distribuyíu por Llaboral Cinemateca, premiáu en Medina del Campo

J.S. REDACCIÓN

CON C DE CIENCIA Y CULTURA

«Un coche cualquiera» narra l'alcuentru d'un home con trés amenazadores mozos a la puerta d'un club col conflictu vascu como fondu

17 ago 2020 . Actualizado a las 22:14 h.

El curtiumetraxe «Un coche cualquiera» de David P. Sañudo, que forma parte del catálogu de curtios en distribución de Llaboral Cinemateca, foi gallardonáu col premiu al Meyor Curtiumetraxe de la Sección Castilla y León del Festival de Cine de Medina del Campo (Valladolid).

Esti trabayu, qu'acaba de proyectase nel Festival Internacional de Cine Islantilla Cinefórum y que va participar en setiembre na sección Next Generation del Brussels Short Film Festival, yá cunta nel so haber colos premios Keler Saria del Festival de curtios al campu Korterraza (Vitoria-Gasteiz), a Meyor Guion nel Hendaia Film Festival y el Premiu de la Prensa al Meyor Curtiu de Castiella y Lleón nel Festival Internacional de Curtiumetraxes d'Aguilar de Campoo.

Col conflictu vascu como fondu Sañudo (Aprieta pero no Ahoga, Ane) presenta un thriller pequeñu pero intensu, que narra l'alcuentru d'un home con trés amenazadores mozos a la puerta d'un club nocherniegu a mediaos de los 90. A partir d'ehí, Sañudo remana con precisión n'una tirante atmósfera onde los nervios y la incertidume van en continuu aumentu dende les primeres imáxenes, conteniendo un españíu de violencia que ta siempres a puntu de lliberar.

Otros curtios de Llaboral Cinemateca

Otru de los curtios que distribúi Llaboral Cinemateca ye «DIYsex» que, en participando programa Future Frames-Generation NEXT de la European Film Promotion ?celebráu nel marcu del Festival Internacional de Cine de Karlovy Vary-, alzóse col premiu ARTSANS a Meyor Montaxe nel Festival Internacional de Cinema de Cerdanya (Cataluña). Esti trabayu, que dirixen Juno Álvarez, Yaiza de Lamo, María Llorente y Mariona Vázquez, cavilga sobro l'usu de la imaxe y el llinguaxe na pornografía mainstream y compite esti mes na Sección Oficial Documentales del Festival de Cine de Málaga.

En Málaga, y nesta mesma sección, va participar otru curtiu asturianu «Un fantasma recorre […]», del cineasta uvieín Tito Montero, que tamién va poder vese en setiembre en Ciudá de Méxicu, na sección Arte y Sociedá del Festival Contra'l silenciu toles voces. Esti certame va acoyer amás la proyección del trabayu de David Rodríguez Muñiz «Beyond the glacier» que va participar na sección Mediu Ambiente y Desarrollu Sostenible. Esti curtiumetraxe sigue atropando selecciones y añade a la so llista la proyección el 27 d'agostu nel Festival Internacional de Cine de Monte Ushuaia d'Arxentina y, el próximu mes, na Sección Planeta del Navarra Film Festival y na Sección Galicia R del Festival Internacional de Curtiumetraxes FICBueu (Galicia).