El xardín del Belles Artes va poder volver visitase a partir del sábadu

La reapertura produzse tres una década na que permaneció zarráu a les visites por cuenta de les obres na pinacoteca

Jardín del Bellas Artes de Oviedo
Jardín del Bellas Artes de Oviedo

Redacción

El xardín del Muséu de Belles Artes d'Asturies, anexu al Palaciu de Velarde, va volver tar a disposición del públicu a partir del próximu sábadu, día 29, tres una década na que permaneció zarráu a les visites por cuenta de les obres que se ficieron na pinacoteca.

Cola rehabilitación del xardín zarra un ciclu d'intervenciones nel muséu qu'empecipió cola recuperación del edificiu de servicios múltiples y que siguió cola apertura del Edificiu Ampliación, y la reordenación de les colecciones, cola consiguiente rehabilitación de los inmuebles de la cai Rúa y Palaciu de Velarde, ente otres obres.

Cola collaboración del Conceyu d'Uviéu y los sos técnicos del serviciu de parques y xardinos, el xardín del Muséu de Belles Artes d'Asturies rehabilitóse respetando la xeometría de los espacios verdes esistentes.

Sicasí, a diferencia de cómo pudo contemplase en momentos anteriores, prescindióse d'asitiar nél cualquier tipu d'obra artística dándo-y cierta independencia y autonomía al respective de los espacios espositivos, informa la pinacoteca. Nel so llugar, instaláronse dellos bancos xunto al prau, camelies y dos Acer palmatum, elementos que van decorar y van completar esti espaciu verde allugáu en plenu cascu antiguu de la capital uvieina y del que va poder esfrutar tola ciudadanía.

Con orientación sur, como tantos otros xardinos pertenecientes a residencies palaciegues urbanes de la dómina, el del Palaciu de Velarde ye un exemplu de l'arquitectura diseñada pol asturianu Manuel Reguera en plenu sieglu XVIII.

La entrada al xardín va efectuase al traviés del muséu y va ser llibre y de baldre pa tolos públicos mientres l'horariu d'apertura del Muséu que preve qu'esti espaciu pueda acoyer actividaes educatives y acciones culturales.

Comentarios

El xardín del Belles Artes va poder volver visitase a partir del sábadu

Cola ayuda de