Alberto Vázquez: «'El sol na escombrera' rellata la infancia de los nuestros güelos»
CON C DE CIENCIA Y CULTURA
El ganador del XI Premiu Alfonso Iglesias de Cómic esplicó que ye una adaptación de Cuando el mundo era Ablaña
04 sep 2020 . Actualizado a las 12:09 h.El ganador del XI Premiu Alfonso Iglesias de Cómic, Alberto Vázquez, afirmó esti vienres que la novela gráfica El sol na escombrera rellata «la infancia de los nuestros güelos» al traviés de la vida de José Fernández Sánchez, un neñu asturianu de la guerra natural d'Ablaña (Mieres).
La obra El sol na escombrera, del creador Alberto Vázquez, llevó'l Premiu Alfonso Iglesias de Cómic en llingua asturiana d'anguaño. El dibuxante mierense yá ganare'l gallardón na so novena edición col títulu Los llazos coloraos. El xuráu destacó «l'enfoque realista y la propuesta sobria» de la obra ganadora, que narra la vida de José Fernández Sánchez.
En declaraciones a Europa Press, Vázquez esplicó que'l cómic ye una adaptación de l'autobiografía d'esti home, Cuando el mundo era Ablaña, onde esti neñu de la guerra que con 12 años evacuaron a Rusia cuenta en primer persona les alcordances de cuando yera un guah.e nel so llugar d'orixe.
«Ye un rellatu preciosu de la vida cotidiana nos Valles Mineros de la época, nun ye un cómic sobre los neños de Rusia», afirmó Vázquez, que señala que en El sol na escombrera van poder vese escenes como la vida na escuela de la epoca, los xuegos infantiles, los oficios perdíos o dir al molín y al cine.
«Tien un poco de too, describe la infancia de los nuestros güelos y eso foi lo que me prestó, que ye un testu guapu y tienru que xenera señaldá», esplicó, p'añadir que nel cómic tamién se ve «la solidaridá ente vecinos» y cuestiones como l'anticlericalismu.
El contestu políticu de la época tamién calistra parte d'esti rellatu, recoyendo temes como'l 1u de mayu, el día que llegó la República o dellos fechos del 34 y el 36. Con too, Vázquez diz que ye menos políticu que la so anterior obra, Los llazos coloraos, onde fai un percorríu peles fuelgues mineres.
Otra de les diferencies, afirmó l'autor, ente les dos noveles gráfiques ye la «comodidá» de trabayar con un testu ayenu, porque Los llazos coloraos supunxo hores y hores de documentación y contrastar datos y fuentes d'informates con historiadores.
'El sol na escombrera' va tener unes 80 páxines y va publicase nos meses próximos, previsiblemente pa mayu de 2021, coincidiendo cola Selmana de les Lletres Asturianes. Con too, enantes, Vázquez va estrenar dos documentales Mines de Figareo. Memoria d'una llucha (1978-1980) y Vicente García Riestra, guardián de memoria.
El primeru acabólu n'abril y cuenta la llucha obrera polos puestos de trabayu, onde los empleaos de la mina llegaron a retener al amu de la empresa, José María Figaredo Sela, güelu del diputáu de Vox por Asturies, José María Figaredo.
El segundu ta dedicáu a la vida y obra del activista antifascista asturianu Vicente García Riestra, que morrió nel 2019 depués de ser l'últimu español superviviente d'un campu de concentración nazi. Espera poder estrenalu en FICXixón si les restricciones sanitaries nun torguen la so celebración.