Una investigación na que participa la Universidá d'Uviéu constata que la crisis climática va adelantrar l'avieyamientu d'anfibios, insectos, pexes y reptiles
16 sep 2020 . Actualizado a las 19:49 h.Un estudiu de les Universidaes d'Uviéu y Glasgow constató que la crisis climática va adelantrar l'avieyamientu de los animales que nun pueden regular la so temperatura corporal, como los anfibios, insectos, pexes y reptiles, nuna llinia d'investigación clave pa establecer programes de caltenimientu de la fauna selvaxe.
Los autores d'esti estudiu, que foi publicáu na revista científica Global Change Biology, son Germán Orizaola, del Institutu Mestu d'Investigación en Biodiversidá de la Universidá d'Uviéu-CSIC del Principáu, y los investigadores de la Universidá de Glasgow Pablo Burraco, Pat Monaghan y Neil Metcalfe.
La relevancia de la so investigación anicia en qu'hasta agora nun se punxera atención nos efectos que los cambeos fisiolóxicos de los denominaos animales ectotermos -toos sacante les aves y los mamíferos- podíen tener sobro l'avieyamientu de los organismos.
Nel artículu descríbese cómo un aumentu de temperatura va trayer una mayor tasa de crecimientu nestos organismos lo que, según los investigadores, va alteriar la so fisioloxía, aumentando los niveles d'estrés oxidativu.
Amás, los autores señalen que va tener un impactu sobro los telómeros, unes estructures que s'asitien nos estremos de los cromosomes y que la so función ye dar estabilidá a la célula y torgar que rexones codificantes d'ADN se pierdan na división celular.
Los investigadores sorrayen que cuanto mayor ye la velocidá de crecimientu y mayor estrés oxidativu, mayor ye la tasa de degradación d'estos telómeros y más rápido se llega a la muerte celular, polo que se tán usando como indicadores d'avieyamientu celular en munchos organismos.
L'artículu d'Orizaola, Burraco, Monaghan y Metcalfe establez la rellación directa ente cambéu climáticu, velocidá de crecimientu, estrés oxidativu, perda de telómeros y avieyamientu.
El profesor Orizaola sostien que cualquier acurtiamientu de la esperanza de vida de los animales va menguar el so potencial de reproducción, daqué que podría producir impactos directos en munches especies y poblaciones, especialmente si yá tán afectaes por cualesquier otru factor.
Los investigadores consideren preciso afondar nesti campu, yá que valoren que podría tener consecuencies bien negatives pal caltenimientu de munches poblaciones animales si se ven espuestes a una tasa d'avieyamientu más rápida.
Nesti sentíu, Orizaola entiende que va ser imprescindible considerar l'impactu que'l cambéu climáticu puede tener sobro l'avieyamientu de les especies pa establecer programes afayadizos de caltenimientu, manexu y esplotación de la fauna selvaxe.