El Principáu entama los circuitos de música, artes plástiques y lliteratura
CON C DE CIENCIA Y CULTURA
La convocatoria de los circuitos de les trés disciplines culturales tien por oxetu la selección d'una serie de propuestes pa la ellaboración d'un catálogu
16 oct 2020 . Actualizado a las 18:21 h.La Conseyería de Cultura, Política Llingüística y Turismu del Gobiernu asturianu entama los circuitos de música, lliteratura y artes plástiques y visuales dientro de la so política d'apoyu a la programación cultural per tol territoriu asturianu.
Los procesos de les trés convocatories tienen un funcionamientu asemeyao al del Circuitu d'Artes Escéniques, puestu yá en marcha, y marquen la exhibición de los proyectos escoyíos pa enantes de fin d'añu, según informó'l Gobiernu asturianu al traviés d'una nota de prensa. La convocatoria de los circuitos de les trés disciplines culturales tien por oxetu la selección d'una serie de propuestes pa la ellaboración d'un catálogu que valga como base a los responsables culturales de los conceyos interesaos en programar al traviés de los circuitos.
La conseyería, al igual que nel Circuitu d'Artes Escéniques, apostó por un sistema de cofinanciación al traviés del que'l Gobiernu asturianu ufre ente'l 50% y el 90% del presupuestu de cada esposición, espectáculu o eventu cultural. Esti porcentaxe varía según la población de los conceyos, de forma que aquellos con menos habitantes reciben apoyu meyor. D'esta manera, Cultura fixó una inversión de 100.000 euros pal circuitu de Música, de 40.000 pal de Lliteratura y de 70.000 pal d'Artes Plástiques y Visuales.
Tanto los conceyos interesaos en sumase al programa como los artistes que quieran presentar los sos proyectos a los trés circuitos culturales han de rexistrase como usuarios al traviés de la web de Llaboral Ciudá de la Cultura. Los creadores, una vez tean rexistraos, van poder presentar la solicitú y la documentación que se precisa en cada convocatoria nesa mesma plataforma.
Per otru llau, la Conseyería de Cultura anunció ayeri na xunta de la Mesa Sectorial d'Artes Escéniques una medría de 81.816 euros na so aportación al circuitu de teatru. De los 147.038 euros previstos nun principiu, pásase agora a una inversión de 228.854 euros nel programa. Esta ampliación fai posible la programación de 136 funciones de 35 compañíes asturianes en 26 conceyos nel últimu trimestre d'anguaño, informa Europa Press.