La norma deroga la de 1994 y pretende garantizar la práctica deportiva de tola ciudadanía y a tolos niveles, en condiciones d'igualdá y non discriminación
30 jun 2022 . Actualizado a las 05:00 h.La Xunta Xeneral del Principáu dio lluz verde, cola única oposición de Vox, a la Llei d'Actividá Física y Deporte, una norma que deroga la vixente dende 1994 y cola que pretende garantizase la práctica deportiva de tola ciudadanía y a tolos niveles, en condiciones d'igualdá y non discriminación.
«Per primer vegada reconozse'l derechu al deporte de la ciudadanía», según destacó la conseyera de Cultura, Política Llingüística y Turismu Berta Piñán, al defender el dictame final, qu'incorporó sesenta del más del centenar d'enmiendes promovíes polos distintos grupos parllamentarios na so tramitación parllamentaria.
Ello ye que Piñán dixo que se sienten «arguyosos d'una llei que ye frutu del consensu», que ye «abierta, tresversal y afecha a les necesidaes de la realidá actual», alloñada de la que fai cuasi 30 años enfocaba'l deporte masculín y de competición y que va «muncho más allá d'una simple actualización».
Ente los principios rectores d'esta llei alcuéntrase agora la promoción de la práctica deportiva pa tola población col fin de llograr meyor calidá de vida y bienestar personal, y el fomentu específicu del deporte n'edá escolar implicando a les alministraciones llocales y a los centros d'enseñanza.
Énte una realidá cambiante, contémplase agora'l deporte pa toos, incluyíos, menores, muyeres o persones con discapacidá, y l'actividá física como fonte de salú pa toos y meyora de la calidá de vida, pero tamién inclúi midíes destinaes a prevenir el dopaxe o la violencia.
Esta normativa nueva fai referencia a la promoción de polítiques actives empobinaes a la incorporación de la muyer a la práctica deportiva y a la so participación nos órganos de xestión, y de la mesma, incide nel fomentu de la práctica de l'actividá física ente les persones con discapacidá y na eliminación de les barreres que s'opongan a la so inclusión.
El proyectu tamién inclúi ente los sos principios rectores l'impulsu de les midíes de control médicu pa evitar el dopaxe o de les destinaes a evitar la violencia, la intolerancia y la discriminación cola collaboración de toles entidaes implicaes.
Ente otres novedaes plantega crear una conferencia intersectorial que s'encargue de coordinar distintes polítiques, y poner en marcha l'Observatoriu asturianu de l'Actividá Física del Deporte, la creación d'una federación polideportiva, pa que les más pequeñes puedan crear sinerxes y economíes d'escala, un códigu de bon gobiernu y midíes que garanticen la presencia de la muyer nos órganos colexaos que seyan escoyíos democráticamente.
La llei plantega un estatus estremáu pa menores, inclúi per primer vegada la convocatoria de los xuegos deportivos escolares, regula los derechos de formación de los deportistes, reconoz al voluntariáu deportivo, reconoz el deporte inclusivu en toles modalidaes.
Tolos grupos reconociéronse nel testu aprobáu güei, sacantes Vox, que votó en contra d'esta llei por considerar que tendría qu'esperase a que tuviere llista la d'ámbitu nacional y que va tener «escasos efectos positivos nel deporte asturianu», según el so voceru, Ignacio Blanco.