Una amuesa de 12 obres del escultor podrá vese coincidiendo cola xornada de puertes abiertes del Parllamentu asturianu
04 ago 2022 . Actualizado a las 22:27 h.Un total de 12 obres, siete escultures y cinco dibuxos, de Navascués (Madrid, 1934-Uviéu, 1978), dataes toes elles ente los años 1971 y 1979, formen parte de la esposición José María Navascués nes colecciones del Muséu de Belles Artes d'Asturies, que s'entamó por cuenta de les xornaes de puertes abiertes nel Parllamentu asturianu ente'l 8 y el 21 d'agostu.
Les obres, procedentes de la colección de la pinacoteca autonómica, tán allugaes nel salón Europa y na escalinata interior del Palaciu. Na inauguración de l'amuesa, el presidente de la Xunta, Marcelino Marcos Líndez, esplicó que'l Parllamentu asturianu impulsó esta esposición porque se siente animáu a collaborar nuna especie de dinamismu espansivu de la creación». «Queremos participar d'esa actividá creadora del arte, ser arrogantes colos artistes, siempres dientro de les nuestres posibilidaes, y practicar una virtú cívica, poniendo a disposición de la ciudadanía parte d'una gran obra, la obra de Navascués nesti casu», añadió.
Pela so parte, el director del Muséu de Belles Artes, Alfonso Palacio, recordó que Navascués foi «un artista singular y complexu que dexó, en malpenes 10 años, una de les obres más importantes non solo d'Asturies sinón de la plástica que naquellos años taba faciéndose n'España». En poniendo en valor la iniciativa de «sacar les colecciones fuera del nuestru recintu del muséu», anunció la recuperación en feches próximes del Premiu de Pintura de la Xunta Xeneral, que va tener formatu de Bienal.