Premiu honoríficu de la Compañía Asturiana de Comedias 2023 a Josefina Lombán y Joaquín Fernández
CON C DE CIENCIA Y CULTURA
Los socios de la entidá tomaron esta decisión col enfotu de rendir un homenaxe merecíu a estes dos destacaes personalidaes del teatru asturianu
05 jul 2023 . Actualizado a las 12:28 h.La Compañía Asturiana de Comedias quier otorgar el so Premiu Honoríficu a Josefina Lombán y a Joaquín Fernández. Los socios de la entidá tomaron esta decisión col enfotu de rendir un homenaxe merecíu a estes dos destacaes personalidaes del teatru asturianu. Tanto nes llabores actorales como de dirección, dieron vida a ún de los principales proyeutos del teatru popular, el Grupo de Teatro El Hórreo, que, dende finales de la década de 1970, lleva con arguyu’l nome de Barcia y de Valdés a tolos requexos d’Asturies, convirtiéndolu nún de los referentes del xéneru costumista.
Amás, consideraron, de Josefina y Juaco, la calidá interpretativa y el so caráuter dientro y fuera de les tables, que los convirtieron en dos figures de l’actuación, querides, almiraes y respetaes pol públicu y polos compañeros.
Con este premiu, la Compañía quier poner en valor aquelles persones o entidaes que trabayen por fomentar la cultura teatral n’Asturies, dignificar el teatru popular asturianu y defender la cultura asturiana como valor estructural de la sociedá. Esta ye la cuarta edición, depués de que fueren galardonaos anteriormente el Salón de Teatro Costumbrista de Candás, el Teatro Jovellanos de Xixón y Cadena SER-Gijón.
La entrega va ser el próximu sábadu, 8 de xunetu, a les 13 hores nel antepar del Teatru Xovellanos de Xixón.