Lía Lugilde: «Blanqueamos dafechu tolo que tenga que ver cola estrema derecha y da mieu»

CIME ye un ciclu de cine y conferencies dedicáu a la memoria histórica y al xéneru, centráu na figura de les muyeres nel contestu de la Guerra Civil, la Segunda República y la so memoria social. Al traviés del cine como ferramienta de reflexón y sensibilización, búscase visibilizar el papel fundamental que estes muyeres desempeñaron na resistencia, na reconstrucción de les sos comunidaes y na tresmisión de la memoria colectiva. Un ciclu qu'entama esti martes 21 d'abril y que, p'afondar nello, falamos con Lia Lugilde, la so direcotra y programadora.

—¿Cómo surde too? Esta ye la segunda edición del ciclu.

 —La primera fixímosla n’ochobre. Foi un pocu un esperimentu pa ver qué salía, porque… bueno, pa ver si se consolidaba, si funcionaba bien. Y la verdá ye que, a nivel de públicu, funcionó espectacular. Y bono, surdió un poco d’intentar eso: aprender un poco de memoria histórica y, sobre too, nun momentu de conflictos como’l que tamos viviendo, con tantes guerres, con xenocidios, con tantu conflictu armáu, pues echar un pocu la mirada p’atrás y traelo al presente, ¿non? Y entós siempre pensamos en facer esi ciclu, xuniendo’l cine y la conferencia, pa que seya pallabra ya imaxe, y que dialoguen y creen espacios como de discursu y d'alderique públicu.  

—¿Qué novedaes hai nesta edición?

—Siempre tamién tuvimos la idea de tratar la memoria histórica, pero sobre too tratar la memoria histórica de xéneru, ¿non? Y poner un poco la mirada nel papel de les muyeres, un poco más escaecíes a lo llargo de la historia o, bueno, falar d’histories que quiciabes hasta agora nun se falaben o nun se falaben públicamente. Entós, na primer edición sí qu'intentamos, bueno, nun intentamos, dirixímosla prácticamente completa a la memoria de les muyeres. Y nesta otra edición quiximos siguir calteniendo esta memoria de les muyeres, pero dar un pasu más allá y, pues eso, fixanos n’otros colectivos vulnerables como pueden ser los neños, nel casu de la Conferencia de los Neños de Rusia, un poco poner la mirada na infancia, que tamién ye una etapa mui vulnerable, y d'otra banda tamién poner la mirada na obra de Lorca. La obra de Lorca por sí sola ye la que trata a toos estos marxinaos: los homosexuales, los xitanos, los probes, les muyeres, y agrupar un poco más a estos colectivos que delles vegaes tán escaecíos o que la so historia se silencia munches vegaes.

—¿Qué crees que se puede consiguir con ciclos como esti?

—Polo menos qu'heba un alderique sobre munches coses. Ye verdá que munchu del públicu que vien, evidentemente, yá conoz la historia, yá conoz les histories, pero hai otru que non, que ta empezando a venir xente mozo, que quiciabes nun tien tantu contactu con estos momentos históricos, y ábrense munchos alderiques, ábrense munches entrugues, y préstame muncho cuando s’abren alderiques interxeneracionales y la xente mozo fala cola xente mayor y amuesa los sos puntos de vista.  

—¿Cómo tratáis, d'una banda, la memoria, y d'otra, el xéneru?

—Ta un poco vinculáu. Nun separtamos memoria de xéneru porque realmente facemos la memoria dende l’exerciciu del xéneru, dende l’exerciciu de rescatar, bono, como feministes que somos tolos que facemos el ciclu, enfocamos la memoria dende la nuesa perspectiva feminista, evidentemente. Y nós facemos too dende esta perspectiva de falar de lo que nun se falaba o de lo que s’intentaba ocultar. Y por eso tamién una figura clave ye Pilar Sánchez, que tien un llabor mui importante, sobre too na documentación d’estes voces escaecíes y perdíes y nel fechu de rescatales y traeles un poco al presente.

—Recuperáis tamién Las trece rosas. ¿Por qué esta película?

—Por delles razones. Una, ye que ye una historia bastante cercana al territoriu. Tamién cuntamos cola asociación de les Trece Roses que tenemos equí, qu'amás tán faciendo una esposición temática con estes trece muyeres, faciéndo llegar esto un poco más al públicu les sos histories más personales. Y d'otra banda, porque creemos que ye una pieza esencial pa entender tamién la historia más recién del estáu. Ye una película que puede llegar a tolos públicos; tamién intentamos programar de la manera más abierta posible pa que pueda atraer a tou tipu de xente, y qu'amás ye una d’eses películes que yo creo qu'hai que revisionales y teneles en cuenta pa saber un poco lo que pasó. Ye que llega un puntu en que la xente mozo tien una desconexón, o bueno, una parte de la xente mozo tien tanta desconexón colo qu'asocedió que delles vegaes a mi dame la sensación de que piensen que nun ye real o que piensen que nun pasó asina, un ciertu negacionismu históricu quiciabes. Entós, bueno, volver traer estes películes, anque yá seyan clásicos y anque seyan películes que se vieron muncho, paezme importante volver poneles.

—Dempués, al día siguiente tenéis Los neños de Rusia, col contestu tal y como ta agora Rusia, ¿cómo decidís poner esto?

—A ver, lo que queremos recuperar ye esa infancia nel exiliu. Nel casu d’Asturies y del norte del estáu, tocó muncho l’exiliu na URSS y nos territorios de Rusia y satélites. Pero yo creo qu'anguaño ponemos esi documental y titulámoslu Los neños de Gaza y funciona esactamente igual. deA la fin, les histories cícliques repítense en distintos territorios, y lo que queremos ye poner un poco’l focu en cómo’l conflictu pue afectar a una infancia mui temprana y, anque seyas a tener una vida meyor n’otru llugar, cómo te traviesa a lo llargo de tola vida y te construye como persona’l fechu de sufrir esto nuna edá tan temprana.

—Depués, toca'l momentu de Lorca, col 90 aniversariu del so asesinatu.

—Queríemos abrazar un poco la mirada d’esto que te comentaba de les otres realidaes, de los otros marxinaos, amás de les muyeres y de la realidá del estáu español. Y coincidiendo amás qu'esti añu van 90 años del asesinatu de Lorca, paecíanos una manera de face-y un homenaxe al poeta y non facer una conferencia clásica sobre lo que foi la so vida, sinón contar la so vida al traviés de les distintes etapes nes que foi escribiendo y recitar estos poemes. Una cosa mui interesante que tien esta conferencia ye que, amás de recitar los sos poemes, Marco Suárez al pianu acompáñanos y va tocar partitures compuestes por Lorca, que claro, yera daqué que la xente desconoz, que Lorca componía música. Entós, la oportunidá de poder escuchar les partitures de Lorca creo que nun ye daqué habitual y creo que va combinar mui bien con escuchar y recitar la so poesía.

—¿Cómo se concibe esti ciclu y tener la escultura franquista de Simancas ehí espuesta nel barriu de Ciares?

—Comentamos ciclos de memoria histórica, ciclos feministes, ciclos de muyeres, ciclos contra la racialización y, de sópitu, caltenemos iconos venceyaos a una ideoloxía tan fascista.  Paezme como contradictorio, ¿non? El intentar dir p’alantre, abrir les puertes a tol mundu, pues eso, falar de la memoria, falar del feminismu, falar de la inmigración, y quiciabes defender toes estes causes y al empar tar tán venceyaos cola ideoloxía fascista. Ellí tán los defensores de que ye arte, que ye un bon escultor, pero hai coses que nun se pueden permitir. Hai coses que yo creo que nun se pueden permitir, y esto, si llegara a pasar n’otros países como Alemaña, ye que ye impensable. O sea, ye qu'estes coses solo pasen n’España. Ye impensable. De repente tenemos eso, l’auxe del fascismu, y llamámoslos «nostálxicos». Blanqueamos dafechu tolo que tenga que ver cola estrema drecha. Da mieu.  

—Pa otres ediciones, ¿qué vos plantegáis?

—Ye una propuesta personal que entá nun debatí col equipu, pero sí que me prestaría poner un poco’l focu en dellos temes que m’interesen y que me prestaría poder tratar. Unu d’ellos sí que ye’l Patronatu de les Muyeres. Prestábame falar un poco d’esa represión que sufrieron les muyeres en plenu franquismu, que malpenes se sabe o entama a conocese agora un poco lo que taba asocediendo dientro d’estos llugares. Tamién m’interesa muncho la vida de les muyeres nos campos de trabayu forzosu y amás cómo maternaben tamién nesos llugares. Ye daqué un pocu complexu d’entender, que pueda xunise nun trabayu forzosu, tar presa y amás maternar y tener fíos nesti contestu. Prestábame echar un poco la mirada tamién a la memoria queer n’Asturies y abrila sobre too a otros territorios. Hai delles opciones escontra ónde abrila, pero un poco ver tamién cómo se trata la memoria n’otros llugares.

---

---

---