Campaña de matriculación n'asturianu y gallego-asturianu pal prósimu cursu

El plazu ta abiertu hasta´l 20 de xunu pa Primaria y del 1 al 15 de xunetu pa ESO y Bachilleratu

Campaña de matriculación
Campaña de matriculación

La Conseyería d’Educación y Cultura tiene en marcha la campaña de matriculación  #YOAPÚNTOME en Llingua Asturiana y Lliteratura pal prósimu cursu. Una campaña informativa con cartelos, flyers y tarxetones dixitales que se reparten en tolos centros sosteníos con fondos públicos del Principáu d’Asturies, amás de difusión en redes sociales y publicidá en medios dixitales.

Dende la Conseyería recuérdase que son munches les razones pa deprender la llingua asturiana: aumenta la nuestra competencia comunicativa, ayúdanos nel aprendizaxe d’otres llingües, sensibilízanos con otres realidaes culturales y llingüístiques y arriquez el nuestru conocimientu y percepción del mundu.

Cuando falamos de multillingüismu tamos falando de la importancia de tener competencia en más d’una llingua. Saber asturianu ye mui beneficioso pa deprender otros idiomes y va averanos a llingües romániques como l’italianu, el gallegu, el portugués, el francés, el catalán

La riqueza d’una llingua refléxase na so lliteratura. Conocer l’asturianu ye abrir una puerta a la so lliteratura, al universu de les sos creaciones, al descubrimientu de mundos nuevos, d’otres formes de cuntar y de pensar.

Los estudiantes de Primaria pueden formalizar la so matrícula hasta’l 20 de xunu y los de ESO y Bachilleratu del 1 al 15 de xunetu.

Comentarios

Campaña de matriculación n'asturianu y gallego-asturianu pal prósimu cursu