Tómate'l branu con filosofía

Estudiantes d'ESO y Bachilleratu participen nel campus d'Humanidaes, nel Milán, onde aprienden pensamientu críticu, llingües, técniques d'escritura, arte, música y arqueoloxía

Campus d'Humanidaes.
Campus d'Humanidaes.

Les universidaes trabayen pa fomentar les vocaciones científiques ente los estudiantes, pero agora, en branu, ye’l momentu tamién de les humanidaes. Con ese oxetivu la Facultá de Filosofía y Lletres de la Universidá d'Uviéu, celebra esta selmana la tercer edición del so Campus d'Humanidaes.

Mientres estudiantes de la ESO y de Bachilleratu de distintos puntos d'España esploren los llaboratorios del campus d'El Cristu o constrúin inxenios informáticos, n'otra parte de la ciudá, nel Milán, cuarenta mozos pasen una selmana de branu con muncha filosofía, aprendiendo un poco más de xeografía, música o arte. El programa ye bien completu y entusiasma a los estudiantes, que desenvuelven el pensamientu críticu, conocen más sobre llingües estranxeres, técniques d'escritura o se converten en detectives del pasáu de la mano de profesores que ponen al descubiertu los secretos de l'arqueoloxía.

El campus remata mañana, pero los participantes yá esfrutaron de clases intensives dientro y fuera de l'aula, aprendiendo a diseñar una esposición y a ver con otros güeyos les obres d'arte. Amás, realizaron distintes visites per Uviéu y el Muséu de Belles Artes.

Anguaño, el campus yá ye una iniciativa bien consolidada na Universidá, que recibió más demanda de les 40 places ufiertaes, daqué que demuestra l'interés de los mozos poles humanidaes. 

Comentarios

Tómate'l branu con filosofía