Les abeyes en Matemátiques y l'agua en Llingua Castellana: la enseñanza ambiental entra en clas

Promover un aprendizaxe ambiental activu en clases de Matemátiques, Llingua Castellana, Ciencies Sociales y Ciencies Naturales, enseñando'l papel de les abeyes nos ecosistemes y el peligru que trai la so estinción en clase de Ciencies Naturales o l'impactu negativu del espilfarru d'agua y enerxía. Esti ye l'oxetivu d'un proyectu denomáu Naturaliza y entamáu pola empresa Ecoembes, al que se sumaron 21 docentes asturianos de 14 centros distintos.

Esta iniciativa pretende dotar a la comunidá educativa de ferramientes pa poder educar en valores ambientales y enseñar a los más neños la importancia de curiar el planeta.

Nesti cursu qu'empieza, 21 docentes asturianu de Primaria van llevar esta mirada ambiental a les sos clases. Estos maestros van recibir los recursos precisos pa impartir les clases al traviés de lo qu'Ecoembes denoma como Escuela de Docentes de Naturaliza. Nesta escuela van poder formase en Mediu Ambiente, nos nuevos modelos d'enseñanza que fomenten la cooperación y potencien el pensamientu críticu y tamién n'aspectos bien cercanos al oxetivu de la tresformación educativa pa facela más sostenible.

El proyectu llega per primer vegada al Principáu pero yá funcionó de manera pilotu n'otres comunidaes. 227 docentes de 22 colexos de Madrid y 7 de La Rioxa yá probaron la esperiencia'l cursu pasáu. Agora estiéndese a tol estáu. En total, la rede va tar integrada por 622 profesores de 478 centros.

El primer balance de la esperiencia foi bien positivu. El caderalgu de Psicoloxía Ambiental de la Universidá Autónoma de Madrid, José Antonio Corraliza, y la doctora n'Educación Ambiental de la Universidá de Zaragoza, Silvia Collada, realizaron una investigación denomada: Conciencia ecolóxica na infancia. Efectos de Naturaliza en población escolarizada y les sos conclusiones reflexen l'aumentu de la conciencia ecolóxica nel alumnáu.

---

---