Los sindicatos denuncien que la conseyería concede menos hores de les que precisen los centros y que dexa a alumnos ensin clases
12 sep 2019 . Actualizado a las 05:00 h.Pocos y pa enriba precarios. Comisiones Obreres (CCOO) y SUATEA denuncien la situación de la llingua asturiana nel entamu de cursu. Si la precariedá foi la tónica xeneral ente los interinos, la situación agrávase nel casu de los especialistes d'esta materia que, en realidá, nin siquier cunten con una especialidá reconocida oficialmente.
«El cursu entama con una contratación de profesoráu de Llingua Asturiana insuficiente pa satisfacer les necesidaes de los centros educativos. La dotación de personal docente fecha pola Conseyería d’Educación nun respuende nin a los pidimientos de los centros nin a la matrícula rexistrada ente xunu y setiembre», diz CCOO. Esti sindicatu denuncia que lo van pagar los estudiantes: «Parte del alumnáu que solicitó estudiar l’asignatura va vese priváu d’esta posibilidá».
Suatea afonda nesta denuncia : «El profesoráu de Llingua Asturiana y Gallego-Asturianu sigue sufriendo otru añu más la precarización nel so puestu de trabayu. Cuasi la totalidá ye profesoráu interino y na primer axudicación asígnáronse-y puestos a media xornada, el 85% de los totales, en munchos casos itinerantes. Esta tendencia a la precarización llaboral con contrataciones a media xornada ye constante nos últimos años: 69% en 2015 y 2016, 72% en 2017 y 82% en 2018». La matrícula, sicasí, sigue creciendo. «Esta política nun respuende a una merma na demanda d’esta materia voluntaria per parte del alumnáu y los padres, sinón a criterios economicistes que primen l’aforru percima la calidá educativa y los derechos del alumnáu a escoyer y recibir llibremente estes enseñances, critica.
El cursu pasáu l'alumnáu de 8 institutos quedó ensin recibir clase meses. En Zarréu-Degaña tuvieron tol añu. Tienen mieu que vuelva a pasar. CCOO asegura que la conseyería denegó xornaes completes a colexos que queríen ampliar la ufierta de Llingua Asturiana a la Educación Infantil. Y docentes de Llingua denunciaron la creación de grupos d’esta área que superaben la ratio máxima establecida pola llei, una práctica que respuende tamién a la intención d’axustar los contratos a medies xornaes.