Iniciativa pol Asturianu denuncia torgues a la matriculación n'asturianu na etapa de 'infantil

Iniciativa pol Asturianu denunció la semana pasada la situación d’un escolín de la etapa d’educación infantil que nun pue asistir a clas d’asturianu a pesar de tar matriculáu n’asignatura. Los propios padres intentaron en delles ocasiones contactar col propiu centru educativu ensin tener nenguna respuesta que supunxera solución. Amás, dende la organización ufrióse sofitu a la familia pa presentar quexa formal ente la Conseyería d’Educación pa buscar una situación a esti problema. La quexa yá ta fecha de forma oficial.

Dende Iniciativa yá se denunciaron nel cursu anterior dellos casos de falta de profesoráu y de problemes de matriculación de los neños en diferentes colexos ya institutos d’Asturies. Nesi sen, la organización fai un llamáu a toles families que s’alcuentren nuna situación similar a ponese en contactu cola entidá pa denunciar estes situaciones y permitir que l’alumnáu que quiera tenga drechu a deprender asturianu nel so centru educativu, como recueye la Llei d’Usu y anunció n’otros cursos la propia Conseyería d’Educación del Gobiernu.

Nun ye almisible qu’un Gobiernu que sofita la necesidá de la oficialidá nun faiga por da-y solución inmediata a estes situaciones llamentables y contraries a la llexislación vixente. Esti cursu tamos asistiendo a recortes, places ensin cubrir pola precariedá de les mesmes, yá que se convoquen más medies xornaes que nunca, y nenguna midida novedosa que permita falar de pasos alantre nel ámbitu educativu. Esiximos a Adrián Barbón, presidente del Gobiernu del Principáu d’Asturies, y a Carmen Suárez, Conseyera d’Educación, cambios dende yá, acordies col so programa electoral y cola llexislación vixente.

---

---