CCOO denuncia qu'l númberu d'alumnos d'asturianu y gallego-asturianu amenorgó dende 2007

El sindicatu pide ameyorar la promoción del estudiu del asturianu

El secretariu xeneral del sindicatu d'enseñanza de CCOO d'Asturies, Borja Llorente Álvarez, y la secretaria de Llingua Asturiana y gallego-asturianu, Marta Mori
El secretariu xeneral del sindicatu d'enseñanza de CCOO d'Asturies, Borja Llorente Álvarez, y la secretaria de Llingua Asturiana y gallego-asturianu, Marta Mori

Redacción

La sección d'Enseñanza de CCOO d'Asturies ellaboró un informe sobre la enseñanza del asturianu y el gallego-asturianu nel que conclúi, ente otros aspectos, que ye necesario «ameyorar la promoción del estudiu del asturianu» pa revertir l'enclín a la baxa del alumnáu nes distintes etapes educatives, en descensu na última década. El secretariu xeneral del sindicatu d'enseñanza de CCOO d'Asturies, Borja Llorente Álvarez, y la secretaria de Llingua Asturiana y gallego-asturianu, Marta Mori, ufiertaron en rueda de prensa los detalles del informe, que ve «evidente que la opcionalidá ente Llingua Asturiana y Cultura Asturiana establecida nel cursu 2014-2015 nun favoreció la elección de la primer área». Consideren por eso que «resulta urxente» estender l'estudiu a tolos centros concertaos y privaos d'Asturies. «Hai qu'impartir l'asturianu en tolos centros educativos, tamién na concertada y la privada, porque parez qu'estraña que nengún estudiante quiera asturianu nestos centros», dixo Mori. L'informe reflexa amás que l'Alministración tien una responsabilidá clara nesti sentíu, na midida na que tien el deber de facer cumplir la Llei d'Usu de 1998, que garantiza l'aprendizaxe del asturianu en tolos niveles del sistema educativu».

Sobre l'alumnáu de Primaria, baxó un 14,55% dende 2007 el númberu d'alumnos qu'opten por asturianu. En gallego-asturianu, la proporción d'escolares qu'opten por estudialo nos centros nos que s'imparte ye del 43,25%. Consideren dende CCOO que ye necesario "ameyorar la promoción y iguar los defectos existentes" como l'ausencia de llibros de testu, diccionarios escolares o material complementariu.

Na enseñanza Secundaria los datos revelen que l'alumnáu qu'opta por estudiar asturianu xube a los 3.742 alumnos en tol Principáu, lo qu'implica un 11,66% del total y un descensu del 8% en comparanza col cursu 2007-2008. Esto ye, según apuntó Marta Mori, por «un diseñu malu de la organización de les enseñances». En Secundaria, dixo, «confundir voluntariedá con optatividá». Asina, los alumnos «nun escueyen realmente si quieren o nun estudiar asturianu, sinón que topen cola obligación d'escoyer ente l'asturianu, una segunda llingua estranxera y optatives determinaes pelos centros». Dende CCOO consideren que los alumnos «nun tendríen que tener qu'escoyer ente la llingua asturiana, que ye un derechu, y aprender una segunda llingua estranxera». «L'estudiante qu'opta pol asturianu arrenunciando a una segunda llingua ye víctima de discriminación», afirmó Mori.

P'ameyorar los niveles d'escolarización n'asturianu en Secundaria y Bachiller -nesta última etapa'l númberu d'estudiantes ye «testimonial», con un 4% del total-, el sindicatu plantea buscar una «solución inclusiva» como la de Primaria, onde l'alumnáu tien d'escoyer ente Asturianu o Cultura Asturiana.

No que se refier a la situación del profesoráu d'Asturianu, Borja Llorente señaló que tán «condenaos» pola Alministración rexonal y la estatal a la «temporalidá y la precariedá, porque nun puen ser funcionarios» y encadenen contratos temporales con retribuciones baxes con contratos de media xornada. Pal sindicatu sería necesario la creación de la especialidá d'Asturianu al traviés del cambiu del real decretu que regula les enseñances. A esto súmase que falten profesores d'esta especialidá. Asina, agora mesmo hai nueve places ensin cubrir, sobremanera en centros educativos del oriente y occidente asturianu.

L'informe recueye, amás del estáu del profesoráu y la enseñanza d'asturianu, una serie d'encamientos y propuestes de meyora pa favorecer l'estudiu d'esta asignatura, toes elles ensin tener que facer oficial l'asturianu nel Principáu. Anque la oficialidá del asturianu xeneraría la especialidá docente «automáticamente», el sindicatu considera que col cambiu del real decretu d'especialidaes pue consiguise ameyorar la situación de l'asignatura.

Marta Mori defendió asina la creación de les especialidaes docentes de Llingua Asturiana y Gallego-asturianu; implantar la enseñanza de dambes asignatures a toles etapes y centros educativos; el fomentu de los estudios universitarios de llingua asturiana; la organización de cursos de capacitación pa los maestros; la recuperación del horariu lectivu en Bachilleratu; l'ampliación de la formación permanente del profesoráu; l'ampliación del plan esperimental de billingüismu; la promoción del asturianu y el gallego-asturianu nos centros educativos; la publicación de recursos didácticos; y la certificación de la conocencia del gallego-asturianu.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Tags
Comentarios

CCOO denuncia qu'l númberu d'alumnos d'asturianu y gallego-asturianu amenorgó dende 2007

Cola ayuda de