Los censos caberos ponen de manifiestu un modelu previsible, acentuáu rápidamente colos años. Les cifres dícenlo too. El mundiu viense p'abaxu. L'oncenu día d'esti mes cellébrase'l Día Mundial de la Población. Si en 1800 perpasaba'l récor de los mil millones de persones sobre La Tierra, nel 2003, llegóse a los mil millones de mocedá.
Nel 2011, el Día Mundial de la Población, que busca un llamáu d'atención sobre la urxencia ya importancia de les cuestiones demográfiques, establecióse pol Conseyu del Programa de Naciones Xuníes pal Desendolque en 1989. Foi una consecuencia d'aportar a los 5 mil millones de persones nel planeta l’once de xunetu de 1987. Nel 2011 llegábase a los 7 mil millones d'humanos nel mundiu. Y nel 2017 avérase a los 7.500 millones.
Nun planeta superpobláu la tendencia al avieyamientu d'Europa fai inevitable y natural la inmigración.
Europa ye'l segundu continente con más densidá de población. Dientro d'ella Asturies ye deles fasteres que la tien más amenorgada.
La esperanza de vida n'Asturies nel 2015 yera de 82,25 años, de les más altes de la Xunión Europea con una media de 80,02. Mientres que l'índiz de fecundidá foi de 1,01 nel mesmu añu y de 1,33 n'España de les más baxes d'Europa.. En 2014, na Xunión Europea la tasa de natalidá foi de 10,17 nacencies por mil habitantes 6,26 n'Asturies.
Xunto a la baxa tasa de mortalidá infantil, pola mor de los avances na economía, salú y educación. Estos númberos compénsense cola inmigración, que n'Asturies entamó de mou feble na cabera década, al empar d'una fuerte emigración xuvenil. Con un millón d'habitantes Asturies tien tendencia a la baxa. Xixón ye'l quinceavu municipiu más pobláu del Estáu español y el primeru d’Asturies. Integrar a la población inmigrante ye una cuestión cultural, la vuelta de los xóvenes ye llaboral. Polo que caltener la cultura y tresmitir la llingua ye un retu pa la sobrevivencia del nuesu pueblu. La tendencia pel momentu nun ye favoratible. Hai de camudar l'estatus demográficu pa que nun siga asina la tendencia que fai más probe al país en tolos aspeutos. Ye una xera urxente que lleva demasiáu tiempu ensin un cambéu de tendencia que-y ponga igua.