Azul Carbayón
Archivo

¿Quién ye'l Lorca?

MIGUEL FERNANDI OVIEDO

AZUL CARBAYÓN

Aficion Oviedo Horizontal.La aficion en el Carlos Tartiere
La aficion en el Carlos Tartiere

Artículu d'opinión de Miguel Fernandi

28 nov 2017 . Actualizado a las 20:30 h.

Primero que la casa de Gran Hermano llegara a la televisión, n'Uviéu yá se magnificaben los sentimientos. Col Oviedo en Primera División yera mui del vieyu Tartiere aquello de 'Esto güel a UEFA' depués de ganar dos partíos de siguío o lo de 'Esti añu baxamos en Navidá' depués de perder trés. Nun hai afición más de contrastes que la carbayona, del blanco al negro y del negro al blanco. Tan de contrastes como fiel, apasionada y arguyosa de los sos colores.

El pasu pela Tercera y la Segunda B quiciaves valió pa esborriar otra frase de les más clásiques. La de '¿Quién ye?'. Oyíla col Espanyol, el Celta, el Dépor o la Real Sociedad. Había que ganar por decretu. Valía un empate en Mestalla pa xiblar al equipu al domingu siguiente en casa. Recorrer la xeografía asturiana en Tercera o visitar a clásicos veníos a menos pela Segunda B espero que sirviera pa nun volver a les andaes. Anque'l fútbol lo que menos tien ye memoria.

Corremos el riesgu de preguntar quién ye'l Lorca y sería hasta normal. La ciudá con varios equipos, con cambios de nome... Ensin mirar n'internet: ¿Cómo se llama l'estadiu onde va xugar l'Oviedo'l sábadu? Si soi sinceru, mirélo'l llunes d'esta selmana porque yo nun lo sabía. ¿Cómo se llama l'entrenador? Y la respuesta de munchos sería la de qu'echaron a David Vidal depués de subilos en veranu pero qu'agora mesmo, ui, selo, selo pero olvidóseme.

«Ensin mirar n'internet: ¿Cómo se llama l'estadiu onde va xugar l'Oviedo'l sábadu?»

Pel Francisco Artés Carrasco pasaron y marcharon de vacíu'l Cádiz, el Córdoba y la Cultural. Y nun pasaron del empate'l Rayo y el Tenerife. Dicen los que vieron al Lorca n'El Molinón que dexaron mui bonos minutos de xuegu colectivu.

¿Quién ye'l Lorca? Un equipu en descensu que te puede pegar una mocada que te vuelva a la realidá. Dicho esto, l'Oviedo tien un mes por delantre pa confirmar la bona racha de resultaos. Oxalá entame con una victoria en Lorca contra l'equipu de Curro Torres.