Xuan Bello, ganador del primer Premiu Nacional de Lliteratura Asturiana

Europa Press / La Voz REDACCIÓN

CULTURA

Xuan Bello
Xuan Bello

El fallu destacó la «estraordinaria calidá y relevancia de la so trayectoria lliteraria»

13 ene 2017 . Actualizado a las 18:02 h.

L'escritor Xuan Bellu foi'l galardonáu cola primer edición del Premiu Nacional de Lliteratura Asturiana, que concede triañalmente l'Academia de la Llingua. En rueda de prensa, el director xeneral de Política Llingüística, Fernando Padilla, lleyó l'acta del xuráu, nun actu presidíu pola presidenta de l'Academia de la Llingua, Ana Cano, y nel que tuvieron presentes otros miembros del xuráu. El fallu destacó la «estraordinaria calidá y relevancia de la so trayectoria lliteraria, que vien xugando un papel fundamental na dignificación y visualización de la lliteratura asturiana y de la mesma llingua». Tamién se señala la proyección estatal ya internacional qu'algama la obra de Bellu, con bien de traducciones a distintes llingües.

Ana Cano espresó'l preste de l'Academia pola decisión. Calcó en que cualquier de los candidatos finalistes (Antón García, Xuan Xosé Sánchez Vicente, Berta Piñán y Roberto González Quevedo, amás del propiu Bello) axuntaben méritos abondo pa merecer el premiu pero «namás puede haber un ganador». Sobre Xuan Bello, señaló que «asitió l'asturianu nel mapa de la lliteratura estatal ya internacional». Concretamente, refirióse al casu de la Hestoria Universal de Paniceiros, que tornada al castellán consiguió'l premiu Ramón Gómez de la Serna nel 2003.

Bellu (Tinéu (1965) publicó la so primer obra en 1982, cuando namás cuntaba con 16 años. Trátase del poemariu 'Nel cuartu mariellu'. Destacó'l so llabor como poeta: Llibru de les cenices (1988), El llibru vieyu (1994), Los caminos secretos (1996) y La vida perdida (1999), anque más granible ye'l so llabor narrativu, con un total de siete noveles, la última La hestoria tapecida (2008). Tamién publicó trés ensayos.

Realizó tamién numberoses traducciones d'obres de la lliteratura internacional al asturianu, como El casu raru del dr. Jeckyll y mr. Hyde, de Robert Louis Stevenson, Trés aventures de Sherlock Holmes (1995), d'Arthur Conan Doyle, o Escuela de melecineros y fábula de varia xente, d'Álvaro Cunqueiro. Fundó con Berta Piñán y Esther García les revistes Andréi y Zimbru, y collaboró tamién cola publicación Clarín. Foi tamién intensu'l so trabayu colos medios de comunicación. Foi director del selmanariu Les Noticies, y collaboró colos diarios La Nueva España y El Comercio.

Con esti premiu, Bello va recibir una dotación de 3.000 euros pol galardón y va ver publicada una selección de les sos obres. La entrega realizaráse'l próximu Día de Les Lletres. Tovía nun ta claro si va realizase dientro del programa de la ceremonia institucional del Teatru Campoamor, o nun actu distintu.