«El diañu» salta a los dibuxos

El teatru de Llaboral-Ciudá de la Cultura va acoyer güey la estrena del curtiometraxe ganador  l'añu pasau del Premio Realizadores Nuevos


Redacción

Esti 21 de payares, el Teatru de Llaboral-Ciudá de la Cultura va acoyer la estrena de «El diañu», un curtiometraxe d'animación n'asturianu. La película, dirixida por Samuel Fernandi, va poder vese na muestra de curtiometraxes --fuera de competición-- nel Día d'Asturies del Festival de Cine de Xixón (FICX).

Ganadora l'añu pasáu del Premio Realizadores Nuevos, «El diañu» ye un curtiometraxe d'animación de cinco minutos produccíu pol Máster n'Animación de la Universitat Politècnica de València y que tien como idioma orixinal l'asturianu.

Nes voces participen los actores José Antonio Lobato (Xuan), Carmen Gloria García (Maruxa) y Pepe Mieres (El Diañu). Amás, na so banda sonora van poder sentise temes de Mapi Quintana, Felpeyu y Tomás de la Güeria.

Con dirección y guión de Samuel Fernandi, el curtiometraxe fala d'un mineru llamáu Xuan Vallina qu'atopa nel castañar un caballu blancu estrañu con una mancha prieta na frente. Nun sabe que ye'l Diañu burllón de los cuentos nos que yá naide cree.

La película va poder vese esti martes 21 a les 20.30 hores na Llaboral, dientro de la muestra de curtiometraxes del Día d'Asturies de FICXixón.

Valora este artículo

4 votos
Comentarios

«El diañu» salta a los dibuxos