La iniciativa musicasturiana.com ye un proyectu que busca convertise nel mayor escaparate online de los artistes y discográfiques d'Asturies, y yá tien a la venta más de 100 referencies
28 nov 2017 . Actualizado a las 20:06 h.La iniciativa musicasturiana.com ye un proyectu que busca convertise nel mayor escaparate online de los artistes y discográfiques d'Asturies. Nestos momentos, la tienda yá tien a la venta más de 100 referencies de tolos estilos. Asina, según indiquen dende musicasturiana.com, la iniciativa surde col triple oxetivu de visibilizar, modernizar y esportar. «Pa que siempre la lleves contigo». Esi ye l'eslogan de musicasturiana.com, un proyectu que naz con trés pegoyos: tienda online pa que puedan mercase referencies discográfiques asturianes en formatu físicu dende cualquier parte del mundu; distribuidora dixital pa que la música d'Asturies tea disponible nes plataformes dixitales (Spotify, iTunes, Youtube, Google Music*); y con un papel d'espardir l'actualidá de la escena asturiana al traviés de les redes sociales.
Esta iniciativa pionera ye una respuesta a la crisis que sufre actualmente la industria musical y qu'afecta especialmente a la música asturiana. «Actualmente yá nun queden cuasi tiendes de discos, la baxada de ventes en formatu físicu ye considerable y cada vez tien más pesu'l consumu de música al traviés de les plataformes dixitales llegales», señalen. La función de modernización busca adaptar la escena a les nueves formes de consumu musical; pa ello, amás de distribuyir dixitalmente conteníos, musicasturiana.com tien un papel activu en Spotify y Youtube onde creó playlists especializaes y una canal propia.
La iniciatica surde del ex guitarrista de Fala Non Caduca y responsable d'otres iniciatives yá desaparecies como'l fanzine Fechu n'Asturies o la web musical Fnast.net, el periodista Xicu Ariza, que nestos momentos trabaya en Madrid. Él ye'l responsable d'un proyectu que busca la esportación de los soníos asturianos gracies a la venta online nos cinco continentes y al calter internacional de la distribución dixital. «A partir d'agora yá nun va haber más barreres físiques nin dixitales; asturianos residentes n'Asturies, emigraos y persones de tol mundu van poder esfrutar de la música asturiana tean onde tean», afirmen.