Iniciativa califica de «precedente mui peligrosu» dedicar una partida de política llingüística a RTPA

Europa Press REDACCION

CULTURA

L'asociación ve «probe» la cantidá para la normalización y promoción de la llingua y recuerda que l'usu nel mediu tien de salir de los sos presupuestos ordinarios

30 nov 2017 . Actualizado a las 11:22 h.

Iniciativa pol Asturianu afirma que pa demostrar el «verdaderu compromisu» del Gobiernu d'Asturies, la partida pal asturianu incluida nel proyectu de presupuestos tendría que ser «más significativa». Per otru llau, refuguen la creación d'una partida dedicada al usu del asturianu na RTPA, dalgo que califiquen como un «precedente mui peligrosu» que podría llevar a qu'estos conteníos acaben fuera del presupuestu xeneral de RTPA.

Al traviés d'una nota de prensa, Iniciativa califica de «descontentu» el proyectu de presupuestos del Gobiernu d'Asturies pal añu 2018, qu'inclúi una xuba «tan probe» pa la normalización llingüística. El proyectu de presupuestos xenerales del Principáu d'Asturies pa 2018 incrementa hasta los 1.677.000 euros la cantidá pa la normalización y promoción de la llingua asturiana, lo que significa una medría de 93.377 euros.

 

Por eso, Iniciativa recuerda que la FSA prometió aprobar na llexislatura próxima la oficialidá, «pero mantién una cifra ridícula pa la normalización llingüística que rescampla la falta de compromisu real». «La OSPA tien un presupuestu de más de 5 millones d'euros, mentes tola política llingüística quier sacase alantre con poco más d'un millón y mediu», indiquen.

Otra manera, la organización refuga la creación d'una partida dedicada al usu del asturianu na RTPA. «Recordamos que l'usu del asturianu nel mediu tien de salir de los sos presupuestos ordinarios», afirma l'asociación, que califica esta partida como un «precedente mui peligrosu» que podría facer pensar que facer conteníos n'asturianu requier presupuestos especiales fuera del presupuestu xeneral de RTPA.

«La RTPA, que tien un presupuestu de más de 20 millones d'euros, nun precisa de 70.000 euros pa facer más y meyor programación n'asturianu, sinón de la voluntá política pa facelo», señalen.