Conviértese na segunda muyer n'algamalu y na primer persona que consigue dos categoríes nun mesmu añu
01 dic 2017 . Actualizado a las 10:03 h.Berta Piñán ye la ganadora de la 38 edición del Premiu Xosefa Xovellanos de novela n'asturianu, gallardón que concede la Conseyería d'Educación y Cultura y que ta dotáu con 3.000 euros. Foi gracies a Como la muda al sol d'una llagartesa, onde a partir d'un fechu criminal, l'autora percuerre distintos aspectos de la sociedá asturiana d'anguaño, sobre too del mundu rural. El xuráu encargáu de valorar les ocho obres finalistes reunióse esti xueves baxo la presidencia del director xeneral de Planificación Llingüística y Normalización, Fernando Padilla Palicio, y tuvo formáu polos escritores Xulio Arbesú Rodríguez, ganador de la edición anterior, Laura Marcos Domínguez, Miguel Rojo Fernández y l'asesora técnica del Serviciu de Planificación Llingüística y Normalización Juncal García Velasco.
A esti gallardón podíen presentase noveles de tema, xéneru y estructura llibres escrites en llingua asturiana con una estensión mínima de setenta y cinco páxines, siempre que foren inédites y non premiaes n'otros concursos. Ente les obres presentaes, el xuráu decidió por mayoría conceder el premiu a la novela titulada Como la muda al sol d'una llagartesa. Nella, según esplica l'acta, «destaca la complexidá narrativa d'una historia bien trabada con numberosos personaxes que caltienen l'interés a lo llargo la llectura de la obra. La novela que, partiendo d'un fechu criminal, percuerre distintos aspectos de la sociedá asturiana d'anguaño, sobre too del mundu rural». La obra presentóse baxo el seudónimu Frida.Abierta la plica, l'autora de la obra ganadora resultóser Berta Piñán. Ye la segunda muyer que gana esti premiu.
Berta Piñán (Cañu, 1963) destaca como una de les voces más sólides del surdimientu lliterariu asturianu. Profesora de Llingua y Lliteratura y académica de la llingua asturiana, empezó cultivando la poesía nesti idioma nuna carrera poética con títulos como Al abellu les besties (1986), Vida privada (1991), Temporada de pesca (1998), Un mes (2002) y La mancadura (2010), publicada n'edición billingüe asturianu-castellanu. Muestra de la so narrativa curtia son obres como La tierra entero (1995) y La maleta al agua (2005). Ganadora de la primer edición del Premiu María Josefa Canellada cola obra Arroz, agua y maíz (2009), el públicu infantil y xuvenil foi'l destinatariu de títulos d'ella como Lula, Lulina (1996), El branu de Mirtya (2005), Tres sieglos construyendo la igualdá (2005), Les coses que-y presten a Fran (2008), L'estranxeru (2009) y La mio hermana ye una mofeta (2011).
Berta Piñán fixo historia nesta edición de los Premios Lliterarios del Gobiernu d'Asturies al tar acabante d'algamar por segunda vez el premiu María Josefa Canellada de lliteratura infantil y xuvenil cola obra 'Vida nel campu'. Asina, convirtióse na primer persona que lleva dos categoríes nuna mesma edición.