La oficialidá supondría una inversión del 0,5% del presupuestu d'Asturies, según l'Academia
CULTURA
Fade nun tomó una postura sobre l'estatus xurídicu de la llingua asturiana, esplicó-y Feito a Riaño
21 may 2018 . Actualizado a las 16:47 h.El Presidente de l'Academia de la Llingua (ALLA), Xosé Antón González Riaño, mantuvó esti llunes un alcuentru col de la Federación Asturiana de Empresarios (Fade), Belarmino Feito, onde-y esplicó que la oficialidá a l'asturiana supondría'l 0.5% de los presupuestos autonómicos y afitaría les bases d'una industria cultural nueva n'Asturies.
Según informó l'ALLA, el presidente de la institución llingüística y el de la patronal mantuvieron una reunión de trabayu esti llunes n'Uviéu, previamente solicitada dende la institución llingüística.
Nel aconceyamientu tamién participó'l profesor d'Economía Aplicada de la Universidá d'Uviéu, José Alba Alonso, y el director xeneral de la Fade, Alberto González Menéndez.
Nesti sentíu, l'ALLA treslladó a la patronal que los empresarios tán llexitimaos pa participar nel debate sobre la oficialidá, pero que «l'exerciciu d'un derechu democráticu y constitucional como ye'l usar la llingua propia nun pue quedar amenorgáu pola mor de plantiamientos economicistes».
Con too, la institución llingüística esplicó a Feito que la oficialidá a l'asturiana supondría una inversión nos presupuestos autonómicos del 0.5%, lo que pa l'Academia ye «perfectamente asumible pola nuestra comunidá».
Nesi sentíu, señalaron qu'esti marcu xurídicu pa la llingua asturiana «repercutiría positivamente na dinamización socio-cultural y económica d'Asturies». Ente los beneficios punxeron d'exemplu como la oficialidá n'otros territorios supunxo'l surdimientu d'empreses y d'una industria cultural.
Posición de la Fade
Según espliquen dende l'Academia, Belarmino Feito siguió con interés estes esplicaciones y esclarió que los sos planteamientos plantearon entrugues sobre les implicaciones de la oficialidá nel ámbitu empresarial, «pero non una toma de postura de la Fade sobre l'estatus xurídicu qu'habría tener la llingua asturiana».
Dambes partes quedaron en volver a xuntase nel futuru p'afondar nel debate y intercambiu d'idees, según indica l'ALLA, que-y ufierto a Fade la posibilidá d'una collaboración inter-institucional «pa contribuyir a una más fonda visualización de la llingua asturiana nel ámbitu empresarial».