La serie, basada na obra de teatru del mesmu nome d'Adolfo Camilo Díaz, tien escritos siete episodios
18 jul 2018 . Actualizado a las 19:49 h.La Televisión del Principáu d'Asturies (TPA) y la productora Daltón-López tan nestos momentos grabando l'episodiu pilotu de Muyeres inesperaes, una sitcom que se va convertir na primer serie de ficción 100% asturiana y rodada, amás, en llingua asturiana. La serie ta basada na exitosa obra de teatru del mesmu nome d'Adolfo Camilo Díaz, ún de los escritores de más renome de les lletres asturianes y qu'exerce nesta ocasión de director y guionista. Según esplicó'l propiu autor, la serie va tener siete capítulos de 25 minutos y cada episodiu va tener un sesgu estéticu identificativu. Asina, va haber capítulos con homenaxes al cine negru, al d'Almodovar o al de Tarantino.
La producción ta alloñada del teatru costumista y tien más que ver coles comedies de situación americanes, les sitcom, con episodios desarrollaos nos mesmos escenarios, colos mesmos personaxes y con trames qu'acaben en cada capítulu. El filu conductor de Muyeres inesperaes van ser les seis muyeres protagonistes, interpretaes por actrices como Elisabet Martín(Saltarela), Isabel Friera (Carne de gallina o Aquí no hay quien viva) o María López (Flores). Asina, una d'elles va ser la protagonista de cada episodiu, pero a lo llargo de la historia va entemecese cola vida anterior o posterior d'otru de los personaxes. Too esto entemecíu con humor acedu, femenín y feminista.
Amás, la serie va tener un banda sonora fecha a costafecha pa la ocasión, anque l'equipu quier incluir na serie cantares n'asturianu pa da-y protagonismu a la escena sonora de la tierra. «Queremos implicar a los axentes culturales del país na producción», esplicó Camilo Díaz Según afirma, el resultáu final va ser un «productu dignu», con «oxetivos de calidá» y «homologable a cualquier sitcom d'humor» qu'abre un «nichu de programación que year radicalmente necesario pal sector».
Nestos momentos, un equipu formáu por 15 persones tán grabando'l capítulu pílotu nel Salón d'Actos del Centro Cultural de Tresona, en Corvera. Esti primer episodiu va emitise en setiembre en TPA y va valir pa testar l'éxitu del productu. Asina, si l'audiencia respuende podríen llegar a facese 13 episodios en total. Pel momentu hai siete escritos.