Pa la sobrevivencia a la dómina de la infoxicación, o sobrecarga informativa, hai de saber cómo guiase nes busques personales n’internet, el númberu descomanáu de correos lletrónicos, los collacios de facebook, tuits y retuits, etc.
La prensa yá dio’l so preste a dixitalizase, y también tien de ser oxetu d’escoyeta pol so xeneralismu. Nesti campu, la tema ye más d’actitúes culturales que de teunoloxía. Una igua dable ye la d’escoyer dellos puntos d’información útil deseyada y caltrialos de mou afayadizu. Pero nun voi entrar en detalles téunicos informáticos. Namái un exemplu. Si un usuariu de Google va a la gueta d’información científica sobre una cuestión puntual, lo meyor ye entrar en Google académicu. Ehí tán disponibles espublizaciones de calter científicu sobre la materia qu’interese. Del mesmu mou, trataríase de seleicionar les canales de radio, videu y televisión. Ello ye como escoyer les películes que se van dir a ver nel cine. Énte la bayura d’información, nun hai otra qu’esbillar. Tener unes referencies, pa nun perdese na marexada de fontes qu’inunden el nuesu tiempu. Asina, quedarámos una axenda diaria nidia, cola que dir faciendo’l camín qu’escoyamos na vida. Lloñe de dictadures comerciales o sociolóxiques y modes impuestes por un falsu sentíu de la tradición fecha pol comportamientu de cotidián.
Asina entenderemos meyor la importancia de la cultura presencial, de les cites importantes, inclusive del ociu a esfrutar. Nun tiempu de desemplegu y precariedá tan grandes como’l que carecemos. Formase yá nun ye enforma. Yá nun s’aporta a un trabayu dignu con unes condiciones bones pa dir acullá de la sobrevivencia. Poro, dende Asturies pue tendese a lo que ye una realidá nos estaos escandinavos. Curiar de los ciudadanos integralmente, pa xenerar una mayor igualdá social, respetu a la multiculturalidá y la estabilidá de cada ciudadanu.