L´anguleru

OPINIÓN

14 dic 2017 . Actualizado a las 21:50 h.

La mitoloxía refierse a un esfuerciu primitivu pa desplicar la natura y a un suañu coleutivu arquetipu del grupu. Poro, furrula abierta a la vida mesma. A les necesidades de los individuos, los pueblos y les estremaes dómines.

Necesitamos creyar los nuesos propios mitos, cuando los que mos impón la publicidá oficial se tornen artificiales. Eso ye lo qu’acaeció n’Asturies con Papá Noel y L’Anguleru.

Cuando Papá Noel asemeyábase demasiáu al márqueting d’una bébora estauxunidense, reinventóse’l mitu de L’Anguleru.

Surdió en L’Arena un personaxe de ficción que pue basase na tradición oral, como l’Olentzero nes tierres vasques. Dempués, una asociación, nomada Garabuxada, entamó una campaña pa esparder el mitu per Asturies (y Lleón), con gran ésitu, gracies en parte a la docencia n’asturianu, que lo fizo atractivu pa la reciella.

El viniente Nadal cumpliráse’l décimu aniversariu de l’aventura sociolóxica, que refuercia creyencies propies na nuesa llingua asturiana.

El númberu d’entidaes, llugares y Embaxadores d’Honor de L’Anguleru, medra y medra. Foméntase la identidá del pueblu al traviés del idioma tradicional. Desplázase l’edulcoráu mitu multinacional por otru nacíu equí. Col tiempo, s’enancha la mitoloxía y les tradiciones. Recupérase asina parte de lo que pudo perdese pola aculturación carecida demientres tanto tiempu y qu’entá  actúa dende los medios de comunicación y dende la parte dirixente de la clas política.

L’Anguleru nun ye namái l’ésitu d’una recreyación cultural, sinón l’enfotu nun futuru nel que lo autóctono se valore como se merez. Cola superación de complexos y la normalización del nuesu heriedu sociollingüísticu y cultural.

Yá seya milenariu o d’esti sieglu.