Esti añu tá en furrulamientu plenu’l Proyeutu 2018 d’oficialidá nel Estatutu d’Autonomía anunciáu l’añu pasáu pola Xunta pola Defensa de la Llingua Asturiana nel Día de les Lletres Asturianes.
Per primer vegada, agora hai mayoría nel Parllamentu non solo p’abrir la reforma del Estatutu, sinón pa inxerir dafechu la oficialidá nel so articuláu.
Esta iniciativa presentóse en setiembre, cola asistencia de los principales partíos políticos, sindicatos, el rector de la Universidá d’Uviéu, y el presidente de l’Academia de la Llingua Asturiana, amás d’alcaldes y conceyales de los principales conceyos del país.
Náguase qu’al traviés del artículu 56.1 entame la reforma del Estatutu d’Autonomía pal llogru la oficialidá.
A la llingua asturiana falta-y la reconocencia oficial que permita la so normalización na comunicación diaria na nuesa sociedá. El marcu estatal y tamién l’européu empobinen al llogru la oficialidá como únicu preséu llegal pa la igua del conflictu llingüísticu asturianu.
La llei d’usu y promoción del asturianu de 1998 dio una probe proteición al idioma, amás de ser incumplida davezu. Dempués de más de 40 años de llucha ye nidiamente insuficiente inclusive pa la so sobrevivencia. Pesie a los avances na escolarización y la lliteratura propies, entá nun ta equiparada en drechos pa los falantes coles otres llingües oficiales del estáu.
Como s’afita na campaña favoratible a la nuesa llingua milenaria: El futuru de la oficialidá tá nes nueses manes. Asina vióse na hestórica manifestación del 21 d'abril, la mayor fecha enxamás pola oficialidá.
Porque esti ye'l momentu. Agora qu'hai una mayoría de votos parllamentarios favoratible a ella na reforma del Estatutu. Pesie a les dubies nes posiciones de dalgún partíu na hora cabera. La oficialidá nun pue esperar un nuevu retrasu más. Un drechu nun pue demorase al resultáu de les vinientes eleiciones, venceyase a la reforma constitucional o cualesquier otra sida.
Si yá se pue facer efeutivu, nun hai escuses pa nun incluyilu na igua del Estatutu d'Autonomía. Pa qu'una llingua siga viva, ye imprescindible que puea usase en tolos ámbitos de la vida. Dende que se deprende como l'idioma de la familia y del pueblu al que pertenez el so raigón hestóricu y cultural.
Los 1.300 años del Reinu d'Asturies y l'Añu Européu del Patrimoniu Cultural son bonos