El día de mañana


Güei vuelve a celebrase otru añu más el Día d’Asturies, nuna fecha que xenera polémica pol so calter relixosu y la so nula veracidá histórica, pero que de toles formes habría de sirvir pa festexar y vindicar la nuestra identidá, poner en valir la nuestra cultura y afondar nes posibilidaes de la soberanía política del nuestru pueblu nel marcu d’un Estáu republicanu y federal.

Sicasí, paez que dende l’actual Gobiernu d’Asturies namás nos ofrecen un intentu de llaváu de cara de la monarquía española que pretende afondar nel papel de les asturianes y asturianos como súbditos y non como ciudadanos. Una institución antidemocrática que xestiona los sos propios intereses en cuenta de defender los derechos y intereses coleutivos.

Mientres allabamos a los monarques na sacrosanta Cuadonga, Asturies sigue inxerta nuna crisis xeneral qu’afecta a toes y caúna de les manifestaciones de la nuestra vida cotidiana: siguimos sometíos a unes agresives polítiques neolliberales impuestes pola Xunión Europea que provoquen l‘abandonu y destrucción sistemática del texíu productivu asturianu, conderguen a sectores cada vuelta más amplios de la sociedá asturiana a la marxinación, el paru y la emigración y vacíen los nuestros pueblos. L’emplegu precariu, la emigración y la esclusión social, siguen persiguiendo especialmente a la mocedá asturiano y a les muyeres. Pero la situación ye igual de grave no que fai a la identidá cultural y la entidá política d’Asturies, especialmente cuando paez que nun queremos exercela.

La cultura y llingua asturiana ye la meyor ayalga que pue atesorar un pueblu y, como tal, hemos de curiala. Nos últimos tiempos ta careciendo fuertes ataques per parte de los sectores más antiasturianos y reaicionarios, nun intentu claru de frenar los avances fechos gracies al esfuerzu de les y los falantes y el texíu asociativu y de llevala a la desapaición.

Énte un horizonte nel que ye más que previsible una reforma constitucional y una revisión del marcu autonómicu, Asturies nun pue volver a quedar nel vagón de cola. El nuestru Estatutu d’Autonomía ha de ser reformáu p’ameyorar la nuestra capacidá competencial, xestionar meyor los nuestros recursos, ufiertar meyores servicios a la ciudadanía y garantizar que se cumplan tolos derechos, incluyíos los llingüísticos.

Otra Asturies ye posible: una Asturies que recupere la memoria histórica, la dignidá y l’autoestima como pueblu; que lluche con fuercia por un país onde seya la ciudadanía y non el mercáu quien controle la economía; que reparta la riqueza y el trabayu, al traviés de polítiques económiques que cubran les necesidaes sociales de les persones y respeten el patrimoniu ambiental y cultural; una Asturies que tea arguyosa de les sos señes d’identidá y al empar abierta a la participación de la población migrante n’igualdá de condiciones y qu’anteponga la llibertá de les persones a cualesquier otru oxetivu y estierre’l racismu, el sexismu y la LGTBIfobia. Onde la democracia participativa, los derechos culturales, llingüísticos y políticos de les persones seyan una realidá.

Güei ye'l día «oficial» d'Asturies, pero mañana ye preciso que los homes, muyeres y entidaes ciudadanes, culturales, polítiques y sindicales, abramos un camín pa derromper un espaciu d’esperanza y algamar un futuru p’Asturies nel marcu d’un Estáu Federal plurinacional y Republicanu que nos lleve a una Europa Social.

Comentarios

El día de mañana