EL 90% los asesinatos a periodistes siguen na impunidá. Según la UNESCO nel Informe Global 2017/2018. Tendencies Mundiales na Llibertá d'Espresión y Desendolcu de los Medios., 102 periodistes foron asesinaos nel 2016.
El 94% anubríen hestories llocales y la metada los muertos taben en países ensin conflictos armaos.
Dende 2006 a 2016, apúrrense los datos vinientes: El 10% yeren muyeres. El 17% yeren free-lance. El 29% trabayaben na televisión. El total foi de 930 homicidios.
Poro, la ONX proclamó nel añu 2013, el 2 de payares como «Día Internacional pa finar cola Impunidá de los Crímenes escontra Periodistes».
No que va d'añu, (a 5 payares) 62 periodistes foron asesinaos, asina como 11 internautes, y 4 collaboradores mentes que 168 periodistes tán na cárcel y asina como 150 internautes y 19 collaboradores de medios, según el Barómetru de Reporteros Ensin Llendes. Los llugares con más asesinatos censaos son Méxicu y Siria. Rescampla'l crime de recién nun consuláu d'Arabia Saudita en Turquía coles sos variaes versiones. A ver en qué finen.
La llibertá de prensa ye ún de los pegoyos del drechu a la llibertá d'espresión. Fai un rol d'informar de mou contestualizáu sobre temes cimeros pa la ciudadanía, empobina l'axenda del alderique públicu y pal desendolcu y la democracia pol so control de los gobiernos y otros poderes.
Ensin aportar a estos estremos, hai otros pilancos nel oficiu.
Asina, Amnistía Internacional denuncia l'abusu de la fuercia policial española y l'aumentu de la llexislación represiva que nagüen por controlar les aiciones pacífiques de protesta restrinxendo y sancionando' l'exerciciu al drechu a la llibertá d'espresión.
Los periodistes faen un llabor d'informar oxetivamente de fechos contrastaos pal públicu que forma mayormente la so opinión gracies al so llabor. Nesti sen el bon periodismu ye, teóricamente, la voz del pueblu, que-y cunta lo qu'asocede y lu educa énte les dificultaes de les hestories peles que traviesa la sociedá na que s'asitie.
L'autoritarismu que nos caberos tiempos xorrez n'Europa tien munches cares. El control de la prensa escrita o dixital, y d'otros medios de comunicación, ye unu de los que más puen influyir na falta de diversidá pa los ciudadanos pa escoyer el mou d'enterase imparcialmente de la so realidá social actual.
Nuna sociedá dixitalizada, el primeru qu'algama la información ye'l que tien el poder. Ta nes nueses posibilidaes, denunciar l'abandonu d 'esta profesión y esixir a los poderes públicos que la tornen al so llugar.