Les muyeres y les sos profesiones

Xuan Porta
Xuan Porta REDACCIÓN

OPINIÓN

04 mar 2019 . Actualizado a las 05:00 h.

Que'l mundiu ta mal fechu ye un llugar común. Que la muyer quier equiparase llaboralmente al home ye la novedá, pola so magnitú, d'estos caberos años.

Cuando la fuercia física nun determina la capacidá y el méritu pa un puestu trabayu, l'únicu elementu d'estremancia ente muyeres y homes ye la maternidá. Tando ésta regulada y protexida pal caltenimientu la especie, nun queden dubies. La igualdá ye'l viniente destín de la Humanidá.

Sicasí, vese que la desigualdá  nuna riestra de trabayos, cuasi toos, ente los dos xéneros, rescampla.

D'esta miente, sacante na Xusticia, la muyer predomina na sanidá, la llimoieza o nel enseñu. Mientres que l'home failo na construcción y na industria.

Pesie al empate de sexos na universidá, pervive'l machismu na sociedá, que pon torgues al trabayu femenín pola discriminación como sida.

La distancia salarial ye ñidia na escala llaboral. Dende los puestos intermedios a los direutivos, la mayoría ye pa los homes. En mayor midida cuanto más altu ye'l cargu.

Na estaya política hai más diputaos que diputaes y senadores homes que muyeres. La novedá hestórica ye la del gobiernu mayoritariamente femenín del Estáu  qu'afitó aquello del Conseyu de Ministres y Ministros nel 2018. Anque entá nun hebo presidenta, nin del país, nin del Estáu. Llogru sí algamáu por dellos estaos europeos como Islandia, Noruega, Estonia, Lituania, Reinu Xuníu, Alemaña, Croacia, Serbia, Rumanía y Malta.

La igualdá ye ún de los drechos recoyíos na Declaración Universal de los Drechos Humanos qu'empobina los marcos llexislativu y executivu de les democracies. Algamala, sicasí, ye un procesu hestóricu de sieglos. Inclusive la ciudadanía y el votu son práutiques afitaes de recién. Nun ye natural como pue paecer que les muyeres y los homes desendolquen trabayos estremaos pola so entidá biolóxica. Ello ye un estereotipu de xéneru tresmitío al traviés de munches xeneraciones de dominiu masculín y qu'agora formen parte del pensamientu machista.

Poro, na Carta de Drechos Fundamentales de la Xunión Europea, nel so capítulu III fálase de: Igualdá énte la Llei, non discriminación, diversidá cultural, relixosa, llingüística, igualdá ente homes y muyeres, etc.

La llucha escontra la discriminación machista, na estaya llaboral, por exemplu, rique l'aición de tolos poderes públicos y del conxuntu la sociedá. Nesi tarrén, hai entá muncha xera que facer pa tentar d'igualanos a los modélicos países nórdicos, que col so llabor continuu nesi sen, son los más igualitarios.

La violencia de xéneru nes sos múltiples formes son un niciu del llau más escuru de la desventaxa qu'inda tien la muyer real nuna sociedá que tiende a la igualdá llegal. Anque les lleis sopelexen lo contrario, nel sur d'Europa les trabayadores con ciudadanes de segunda respeuto a los trabayadores por más que faigan les mesmes funciones nel so emplegu.

La hestoria, la costume y la relixón, nun puen ser el llastre que torgue'l desendolque de los drechos de la metada de la población. De cómo se dirixa l'enclín na igualdá llaboral dependerá la igualdá real en tolos campos. El nuesu entornu européu ha guianos y facer que xubamos el llistón y el puestu ente los estaos más avanzaos.