La reivindicación llingüística moderna comenzó en 1974, nel final de la dictadura, cola creación de Conceyu Bable dende les fueyes de la revista «Asturias Semanal» y darréu en, 1976, cola creación d'una sociedá cultural del mesmu nome. Daquella, xunto a les pancartes de «Llibertá, amnistía y estatutu d'autonomía» taben les de «Bable nes Escueles» y les de «Volvéi la llingua al pueblu».

Cola llegada del nuestru órganu de gobiernu preautonómicu, el Conseyu Rexonal, y la redaición d’un Proyeutu d’Estatutu d’Autonomía, l’asturianu entró na axenda política como nun podía ser d’otra manera y, asina, en 1980 un añu primero de l’aprobación definitiva del mesmu nel Congresu de los Diputaos, constituyíase l’Academia de la Llingua Asturiana. Hemos de conseñar que la redaición del testu estatutariu foi recortada na tramitación parllamentaria del Congresu que desanició la referencia al bable del artículu 4 como «lengua específica de Asturias», lo que nos tendría abierto’l camín a la equiparación llingüística, seguramente, d’una manera más temprana y, pelo menos, aforrao munchos debates con aquelles persones qu’a lo llargo d’estos años negaren inclusive la esistencia del asturianu como llingua.

Dada la situación d’esceicionalidá del idioma en comparanza coles demás llingües del Estáu nun se pudo vivir con normalidá nengún Día de les Lletres a lo llargo de los últimos cuarenta años. Y dende’l primeru, que se celebró en 1980, hubo que velar polos derechos llingüísticos énte aquellos que se proclamaben como «l'Asturies sensata y pensante», que negaron la realidá llingüística d’Asturies y torgaron midíes que pudieron ayudar a revitalizar l’idioma nuna década clave pa la instauración de la democracia como fueron los 80. Asturies, amás de la oficialidá, perdió trenes como’l decretu de billingüismu o la entrada con puxu del asturianu na Universidá. Sicasí, consiguióse un pasu clave que foi l’inxerimientu, a taramiellos y con dificultá, del asturianu nel sistema educativu.

Na segunda metá de los 90, concretamente en 1995, Izquierda Xunida cambia nel so Congresu la denomación del partíu que pasa a ser billingüe y asume como propia la llucha pola oficialidá nel so programa eleutoral, siendo xunto col PAS la única formación na Xuna Xeneral que defende esti marcu xurídicu pa la nuestra llingua. Nel mesmu sen, en 1996, surde’l Pautu pol autogobiernu y la oficialidá qu’intentó axuntar a distintos sectores de la sociedá asturiana, llegando hasta a un cientu d’asociaciones, na defensa d’un Estatutu d’Autonomía nuevu que supunxera mayores competencies p’Asturies y el reconocimientu d’esi derechu. Y, a la fin, col pieslle en falsu de la reforma estatutaria lo único que se pudo algamar foi la Llei d’Usu de 1998 qu’anque anguaño s’amuesa claramente insuficiente foi’l fitu pa los pocos avances que pudimos tener en materia llingüística nos últimos 20 años… Oficialidá de la toponimia, presencia en medios y campañes instituciones y, sobremanera, la xeneralización de l’asignatura de Llingua Asturiana nel enseñu.

Col mesmu enfotu qu’iniciatives anteriores, nel añu 2004, naz el Conceyu Abiertu pola Oficialidá, qu’énte una segunda intentona de reforma del Estatutu d’Autonomía asturianu llenó les cais en defensa d’un artículu 4 amañosu pal futuru del idioma. De toes maneres, les marches multitudinaries nun fueron abondo y una de les redaiciones de dichu artículu llegó a referise al asturianu como «modalidá llingüística». Asturies otra vegada, perdía una oportunidá histórica.

Y, asina, llegamos a 2019. Cuarenta años depués y coles mesmes problemátiques no que fai al idioma pero con un consensu social nunca visto. Toles encuestes sociollingüístiques apunten a un apoyu mayoritariu a la equiparación de derechos llingüísticos n’Asturies y l’apoyu a esta midida ye visible dende tolos sectores de la sociedá: Universidá, partíos políticos, sindicatos, mundu asociativu… Estes eleiciones son, otra vuelta, decisives. Xugámonos algamar na Xunta Xeneral una mayoría política que permita, de toes toes, reformar l’Estatutu d’Autonomía y vivir nuna Asturies con más competencies y más derechos.

Mentanto, yo voi siguir pente calles de cristal, naguando pol sitiu míu, onde too tien sentíu, onde soi quien quiero ser. ¿Y tu?

Comentarios

Cuarenta años en cuatro díes