Félix Ródríguez de la Fuente, Greta Thunberg y los negacionistes del cambéu climáticu

OPINIÓN

Greta Thunberg
Greta Thunberg Shannon Stapleton

12 dic 2019 . Actualizado a las 05:00 h.

Cuando yera una neña nun perdía por nada del mundu’l programa «El Hombre y la Tierra» que dirixó y protagonizó de maraviya Félix Rodríguez de la Fuente. Esti carismáticu médicu naturalista averó a los espectadores l’ecosistema de la Península Ibérica, Venezuela, L'Amazones, Canadá y Alaska, despertó na mio xeneración la conciencia ecolóxica y el respetu a la naturaleza. Amás de contribuyir al rescate del llince ibéricu y la recuperación del osu pardu y el llobu, tuvo un papel mui importante na conservación de la biodiversidá. Si Félix Rodríguez de la Fuente perteneciere a la xeneración de Greta sedría tamién enforma criticáu como güei ye Greta Thunberg, pero nos años setenta nun había fakenews peles redes sociales, nin naide podía cuestionar a dalguién de tala sonadía. Güei, una persona tan peculiar como él, qu’entamó la escuela a los diez años, y que deprendió los más de los sos conocimientos de forma autodidacta y que se dedicó a criticar la vida urbana, la medría ensin llendes y la destrucción del mediu ambiente, sedría tamién la diana de toles crítiques. 

Ye verdá que Greta con 16 años ye un exemplu, una voz reconocida y escuchada polos líderes mundiales cuando critica la so falta de compromisu y les sos incongruencies continues. Y xustamente por ser una voz reconocida, son munchos los partíos, coleutivos, empreses y persones que por porgüeyos económicos nun-yos interesa qu’haya cambeos nesti tema y traten de desprestixar a esta activista medioambiental sueca.  Paezme que nun ye importante la profesión de los padres de Greta, si influyen muncho o non na fía, si ta convirtiéndose nuna persona abondo afamada y mediática, lo que ye preocupante ye que dalgunos políticos d’estrema derecha de Francia consideren a Greta mui moza pa falar d’estos temes: «Nun escuchéis a los neños, escuchái a los científicos». Ella contraataca col so llibru tituláu: Nadie es demasiado pequeño para cambiar las cosas, que lo diz too. Ye más, naide nel so sanu xuiciu camienta nestos momentos que nun hai qu’escuchar a los científicos, pero tal como diz Greta, ensin dulda tamién hai qu’esixi-yos que se comprometan con un tema tan trescendente como ye’l cambéu climáticu.

Ye terrible cómo los negacionistes del cambéu climáticu traten de desprestixar a esta moza comprometida col cambéu climáticu y el calentamientu. Na so primer Cimera Internacional del fumu, un eventu que quier «contraprogramar» la Cimera del Clima de Madrid, dalgunos de los sos comentarios indiquen l’altor moral que tienen: «Voi encargame personalmente de poner nel so sitiu a la neña climática, cuando la alcuentre voi echa-y tol fumu d’esti puru a la cara y mandaréla otra vuelta al colexu». Estos antiecoloxistes nun entienden que’l mensaxe de Greta ye imparable. Los sos discursos fáense virales nes redes sociales. Discursos qu’empleguen el so poder dixital pa esixir a los adultos que tomen midíes escontra lo que, ensin nun se pon remediu, va ser una llaceria pa la humanidá. Yo toi d’alcuerdu dafechu con Greta cuando diz que frenar la crisis climática qu’enfrenta’l planeta «nun va venir de los poderosos». Ye la xente que se moviliza nes cais pidiendo aiciones reales los que van facer el cambéu. 

Los neños, los mozos y los adultos podemos manifestanos, llamentablemente los animales non, y toi segura que sedríen los más reivindicativos si pudieren y supieren que se xueguen la so superviviencia (nel añu 2017 había una disminución d'un 81% d'especies d’agua dulce, 38% d’especies terrestres y 36% d’especies marines). Tando asina la situación, la comunidá científica fala de la sesta estinción por mor de l’aición del ser humanu: el consumu de combustible fósil, l’acidificación de los océanos, la contaminación, la deforestación y les migraciones forzaes qu’amenacen toles formes de vida. El portavoz de l'axencia de la ONX pa los refuxaos n’España, diz que nos arriesgamos a que nel mundu nun haya nengún llugar a salvu del cambéu climáticu. El cambéu climáticu ye un tema poliédricu que pue mirase dende múltiples perspeutives, pero ye necesario protexer a los animales, acabar cola probeza y la desigualdá y empoderar a les muyeres. Ensin dulda l’aumentu de les temperatures, del nivel de la mar y de la frecuencia ya intensidá de los desastres medioambientales va provocar más discriminación a les neñes y les moces, yá discriminaes pol xéneru y la edá. Ye un fechu que, sobre manera, son les neñes y adolescentes les que sufren esplotación, violencia física y sexual, matrimoniu infantil o embaranzos tempranos. Ye otru fechu incuestionable que van tener menos recursos pa movese, lo qu’aumentará les tases de mortandá. Como en munchos países son les muyeres les que se dediquen a los llabores de la casa, veránse obligaes a dexar la escuela pa buscar agua, esponiéndose más al acosu y la violencia. 

Ye importante asina, que les polítiques de xéneru reconozan les necesidaes específiques tanto de les neñes como les muyeres al rodiu del cambéu climáticu. Han asegurase fondos y aiciones pa la so asistencia, incluyiles na formulación y aplicación de planes d'adautación al cambéu climáticu, asina como garantizar la integración d’informaciones nes polítiques educatives y nos currículos escolares. N’España la ministra d’Educación ta acabante de dar anuncia de que va incluyise una asignatura d’emerxencia climática. Pa que los políticos consideren importante desarrollar estes midíes faen falta munches más persones como Félix Ródríguez de la Fuente y más neñes como Greta Thunberg qu’acaben dafechu coles fake news y les medies verdaes de los negacionistes del cambéu climáticu que namás-yos interesa ganar más perres ensin dar más que pa ello tengan que dexar el nuestru planeta ermu.