La utopía, España, California y el neñu Xesús enxauláu

Donald Trump
Donald Trump

Redacción

La pastora principal d’una ilesia metodista de California critica la política migratoria del presidente Donald Trump, asitiando un belén nel que la familia de refuxaos más conocida del mundu: la Sagrada Familia, Xesús, María y Xosé, apaez enxaulada pa representar a les miles de families que tán neses condiciones. Xunto a la imaxen pregúntase sobre lo qué pasaría si esta familia «buscara na actualidá abellugu n'Estaos Xuníos». Con toa seguranza tanto a los que son relixosos, como los que non, quedaríen en shok si separtasen a María y Xosé, de Xesús, al que llevaríen, xunto con más de 5.500 neños, a un centru de detención nel que permanecería encerraú un bon tiempu. 

Situaciones similares, anque non tan dramátiques como les que pasen na frontera mexicana, tamos viviéndoles nuestru páis. Marruecos ye un país de tránsitu y España, la muria d'Europa, dalgo asemeyao a México, que ye la paré que s'alza frente a Estaos Xuníos. En 2019, dende Melilla y Ceuta, casi 30.000 persones cruciaron la frontera por puestos non habilitaos, per mar (24.000 persones vienen en pateres) o per tierra. Asina pues, nel sur español y el norte mexicanu hai fluxos migratorios asemeyaos. Como siempres son les persones más vulnerables les que suelen trespasar los territorios, ente los que destaquen les muyeres preñaes, xunto coles neñes, neños y adolescentes, tal como diz l'informe Redodem, de la organización Entreculturas. Ello ye que como «asocede en México, per Marruecos y la frontera sur d'España pasa un corredor migratoriu. N'unu provienen de Centroamérica y n'otru d'Oriente Mediu, rexón subsahariana y Magreb», esplica María Vieyra, abogada del Serviciu Xesuita de Migrantes. 

Los motivos que tienen pa dexar los sos países y venir a buscar un futuru n’América o España son estremaos: van dende la desigualdá y los desastres naturales, hasta los elevaos índices de violencia. Munches muyeres fuxen del so país nel que son potenciales víctimes de trata pa la esplotación sexual. El contestu económicu, ye dicir, la probeza, ye otru de los principales motivos pol que tantes persones abandonen los sos países. La mocedá ye la única característica que da un aspeutu homoxéneu a los grupos que se treslladen, con una mayoría con menos de los 30 años y casi la totalidá menor de los 45. Hai otru paralelismu entre Méxicu y España: dambos países controlen les sos fronteres pa disminuir el númberu d'entraes y eso fai qu’aumente la vulnerabilidá de les persones migrantes y refuxaes.

L’otru día vi un anunciu que me llamó muncho l’atención que dicía dalgo asina: ye un fechu matemáticu qu’en Navidá nos encante repartir. Los turrones y les lluces fáennos baxar la guardia, pónennos d'un humor distinto y esto fai que cuando nos xuntamos cola familia y amigos entamamos a dar regalos, besos, amor... Yo espero que tanto en navidá, como en tolos díes del añu, con o ensin turrones y lluces, queramos repartir xusticia ya humanidá, y tengamos procuru pa que la nuesa voz s’escuche cuando reclamamos los derechos humanos que se-yos nieguen a munches persones migrantes.

Dalgunos diríeis lo utópico que ye pensar que podamos camudar eses situaciones por mui inxustes que seyan. A min tamién me paecería utópico ya imposible qu’una ilesia americana criticase la política migratoria del presidente de los Estaos Xuníos y qu’asituase un belén onde María, Xosé tean xuntos, pero separtaos del so neñu Xesús, que tamién ta enxauláu, si nun fuera porque asina pasó y asina lo recoyeron los medios. Sedría bono qu’enxamás renunciemos a ser utópicos. Vamos entamar un nuevu añu y con él unos bonos propósitos. Faigamos como esa ilesia americana y busquemos la meyor manera pa que se visibilizen estes inxustes, inmorales ya inhumanes situaciones. Si queremos frenar a quien abuse de la so posición de poder, regalemos nuestru tiempu y esfuerzu en denuncialo. Si asina fuere, toi convencida dafechu que viviríemos nun mundu más xustu ya humanu, onde los más vulnerables tendríen los mesmos derechos que los más poderosos.    

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

La utopía, España, California y el neñu Xesús enxauláu