Cuando falamos de feminismu ye importante destacar qu’esti movimientu lleva trabayando dende va más de tres sieglos pola igualdá de derechos, al tiempu que reconoz a la muyer como xeneradora del so propiu cambéu. Sorpriende de mano una encuesta recién del CIS que señala que’l 21 % de los homes y el 14% de les muyeres acepte como verdá que’l feminismu quier el cambéu del dominiu del home pol de la muyer. Ente estes muyeres ta la diputada de Vox Alicia Rubio qu’amás de dicir que «el feminismu ye un cáncer», pide que la costura seya una asignatura porque «empodera a esgaya coser un botón». De toles formes, si s’analizen cómo dalgunos medios de comunicación recueyen acríticamente como verdaes les mentires, estereotipos y conceptos falsos y maliciosos de les formaciones d’ultraderecha pa tratar d’engañar o desprestixar; ye dicir, les fake news sobre’l feminismu y les feministes, puen resultar más comprensibles y menos sorprendentes estos datos.
Estes formaciones ultraconservadores, a les que llamentablemente siguen tantes vegaes el Partido Popular y Ciudadanos, paez que quieren engañar al pueblu siguiendo les táctiques d’un home al que munches vegaes trátase como conflictivu, déspota, cruel, oportunista, misóxinu y mentirosu, qu’amás ye precursor del marketing políticu y qu’aparentemente nun dulda en saltar dalguna llei p’algamar los sos oxetivos. Con toa seguranza viennos a la cabeza’l nome del polémicu presidente de Los Estaos Xuníos, pero esta vegada esti personaxe nun lleva’l protagonismu, sinón un Borbón: Fernando VII, l’apodáu rei felón, ye dicir, el deslleal qu’en vez d’igualar la monarquía a la so eterna rival anglosaxona, como prometió, dedicóse a dar caza a tolos ilustraos españoles, engañando al so pueblu, ensin tener nengún miramientu en saltar les lleis que-y diera pola real gana p’algamar el so oxetivu. Ello ye que, anque fuere un misóxinu empederníu, al nun concebir nengún fíu varón, defendió a una muyer nel tronu, ye dicir, a la so fía, tal como lo faen los dirixentes de Vox cola infanta, anque nun seya fía d’ellos. Otru aspectu nel que coincide con estes formaciones de dereches, ye qu’hubo munches esperances nél porque yera un periodu críticu pa España nel qu’había qu’apostar pola modernización y les llibertaes, pero’l so mandatu foi desastrosu dafechu. Como desastroses tán siendo les midíes plantegaes nes comunidaes gobernaes pola derecha que siguen les señales de la ultraderecha, y como amuesa tenemos en Madrid la célebre presidenta Ayuso que caldía sorpriende coles sos declaraciones: dende los atascos al albuertu, que son una verdadera fiesta informativa.
El fechu ye que nengún historiador ye quien a dicir nada bono de Fernando VII, por mui deseáu que fuere, nin tan siquiera nenguna de les sos tres muyeres. La primera, María Antonia de Nápoles, llamólu dende fatu, ociosu, mentirosu, y díxo-y que nun yera un home físicamente. Sicasí, fai falta destacar que llamentablemente supo arrodiase d’una camaretada de nobles y altos cargos que nel entamu del sieglu XIX foi pa presentar siempres al rei como la encarnación del bien frente al mal que representaben los otros y antroxar la verdá: foi un «xuguete en manes de Napoleón», como diz el catedráticu Emilio la Parra, pero figuró como’l monarca que lliberó al pueblu del rei invasor y atribuyóse los méritos de la victoria na Guerra de la Independencia, cuando la resistencia de les clases populares foi la que fizo posible.
Yo supongo qu’habrá munches muyeres, y homes que s’arrepienten de votar un partíu con unos dirixentes políticos que son una calcomanía del rei Fernando VII: déspotes, crueles, tiranos, oportunistes y mentirosos. Un estudiu fechu pola compañía d’investigación IPSOS l’añu pasáu asitia España tanto a nivel européu como mundial, pese a les fakes news de la ultraderecha, como una de les naciones que más avanzaron en materia d’igualdá y onde la creencia de la igualdá ta más espardida ente la población, magar que munches muyeres n’Europa entamaron a votar enantes y qu’en 40 años el gobiernu franquista reculó en tolos derechos.
Y pa finar taría bien que nesti Día Internacional de les Muyeres nel que persones de tolos xéneros, edaes, oríxenes, relixones y países van salir a la cai pa reivindicar un mundu más igualitariu, Alicia Rubio, la mencionada diputada de Vox de tanta sonadía, contestare a estes entrugues: ¿enteróse usté y la so formación política que’l cáncer ye Vox y non el feminismu porque traten de torpediar los consensos algamaos sobre la igualdá y la violencia machista? ¿Dirános a la fin por qué’l so partíu que s’asitia siempres na llende de les lleis, y poro, de la Constitución, llama a les demás formaciones polítiques d’izquierda anticonsticucionalistes? Y pa rematar, ¿dexará la so actividá parllamentaria pa empoderase faciendo costura y cosiendo botones? Ensin dulda, una incógnita qu’a munches persones va quita-yos el sueñu.