El día 16 d’ochobre la Xunta pola Defensa de la Llingua Asturiana llámanos a una manifestación que, baxo la palabra oficialidá, repite, quién sabe si la última vez, esa reivindicación que-y diba valir d’encontu a una política llingüística nueva planificada pa salvar les llingües propies d’Asturies, a la vez que diba amparar la llibertá d’elección de les persones que les falen.
Quiero confesar que siempre me prestó esti movimientu de reivindicación llingüística anque soi d’una xeneración que nun tuvo la suerte de poder formase nel so usu escritu, así que precisé ayuda pa traducir estes notes. Identifícome colos sos fines y medios porque ye una llucha por derechos sociales ensin reconocer, porque siempre se manifestó d’una forma respetuosa y pacífica pola igualdá ente les persones y pola llibertá d’elección de dalgo tan íntimo como la llingua na que cada quién se quier rellacionar cola so comunidá más allegada; y, cómo nun lo dicir, pola heroicidá cola que caltuvo la llucha en tiempos muncho más abegosos que los d’anguaño pa esperar cualquier llogru, un avance mínimu, un éxitu parcial…
Póngome al llau d’esi movimientu, tamién, porque quiero apartame de los intolerantes y señalalos; de los que tracen de siguir discriminando a la xente pola llingua que falen, de los que quieren que la llingua nun alcuentre víes pa la so sobrevivencia. L’odiu y la crispación, pa ellos. Presentaron la pluralidá llingüística d’esta tierra como un problema y dedicaron toles sos fuercies pa llevar a cabu un plan d’esterminiu llingüísticu. Apostaron pol llingüicidiu, pero perdieron esi apueste.
Agora por fin hai una xeneración nueva qu’aporta a les instituciones con otru espíritu, qu’enllena los escaños de la Xunta Xeneral, que tien nes sos manes establecer un marcu nuevu de convivencia nesta comunidá autónoma, un estatutu d’autonomía qu’anueve’l de 1981, que depués de 40 años fálta-y modernidá y precisa afacese a los tiempos que cuerren. Ye una xeneración que se formó en llibertá, ensin tantos prexuicios, que pudo deprender asturianu o gallego-asturianu na escuela, que ve eses llingües como una riqueza que tienen la responsabilidá de caltener pero tamién ve nelles una ferramienta de comunicación normal y natural. Y eses dos visiones son complementaries y mutuamente necesaries: namás si se promueve l’usu, namás si se protexe la llibertá de los y les falantes, namás si se fai pertinente la presencia de la llingua en cada vez más ámbitos de la vida de la sociedá, estayes productives, culturales, creadores de riqueza…, namás asina va poder garantizase la tresmisión xeneracional y la pervivencia del idioma.
Por eso l’estatutu d’autonomía tien que reconocer la oficialidá del asturianu y del gallego-asturianu. Por eso voi dir a la manifestación d’esti sábadu n’Uviéu y por eso llamo a participar a tola xente que como yo simpatiza coles causes de la igualdá llingüística, de la xusticia y de la llibertá.