Na nueva Llei de Proteición Animal de 2021, de calter estatal, no que cinca al maltratu animal afita lo que vien darréu: Prohíbese maltratar a los animales o agredilos físicamente, asina como sometelos a tratu neglixente o cualesquier práutica que-yos puea producir sufrimientos, daños físicos o sicolóxicos o ocasionar la so muerte.
D'esta miente, tórgase dafechu la muerte d'animales como l'asocedida na sablera de Salinas, pola mor del atropellu d'un podencu por parte d'un tractor de llimpieza del ayuntamientu que diba a una velocidá escesiva según los testigos, que lo grabaron en videu.
Na que'l conductor nin siquier paró tres matar al animal y na que la policía nun quixo facer denguna dilixencia punitiva cola escusa de que se trataba solo d'un perru. Un miembru de la familia pa los sos dueños. Lo que yá ye normal.
La llei permite la suelta de perros na sablera sacante la temporada de baños. Trataríase d'una aición de maltratu con muerte ensin denguna penalización. Porque'l conductor nun paró nin al ver a los pocos perros que xugasben, nin tres l'atropellu. Y pola falta d'empatía y profesionalidá de la policía de Castrillón, que nin ficieron un test d'alcoholemia al conductor como se-y reclamaba.
Les costumes bárbares, tan enraigonaes nel tiempu, lleven a fechos como esti, na segunda década del sieglu XXI. Que nun puen tolerase de dengún mou nun territoriu de la Xunión Europea, na vanguardia mundial na proteición llegal de los animales.
Hai d'asumir los fechos d'esta triba y que tengan dalguna rempuesta dende les alministraciones, pa que'l nuevu espíriutu de xusticia animal medre onde siempres foi probe.
Como dixo Martin Luther King: «La inxusticia en cualesquier parte ye una amenaza a la xusticia en toes partes». Que nun vuelva a pasar l'añu qu'entama.